Aslay, Msagasumu Kuifunika Mbagala Valentine’s Day

UKIWA ni mwezi wa malavidavi, wakali wawili, Mfalme wa Singeli, Seleman Jabir ‘Msagasumu’ pamoja na hitmaker wa Ngoma ya Natamba, Aslay Isihaka wanatarajiwa kuufunika Uwanja wa Taifa wa Burudani, Dar Live uliopo Mbagala-Zakhem jijini Dar katika Sikukuu ya Wapendanao ‘Valentine’s Day’ (Feb. 14).

Meneja na Mratibu wa Dar Live, Rajabu Mteta ‘KP Mjomba’ alisema kuwa, usiku huo ambao ni maalum kwa wapendanao, wameandaa zawadi hizo ikiwa ni maalum kwa kutambua mchango wao kwa watu wa Mbagala na Temeke kwa ujumla.

“Sote tunajua uwezo wa Aslay ulivyo juu, hakuna ngoma ambayo ameitoa ikawa mbaya tangu akiwa katika muunganiko wa Bendi ya Yamoto, kwa nini sasa asiwe tu Mfalme wa Mbagala kwa kuwa hakuna anayemfikia kimuziki kwa kanda hii.

“Tukija kwa Msagasumu naye hivyohivyo, yeye ndiye aliyeifanya Singeli ikakubalika na kila mtu hivyo mchango wake ni muhimu, tutampatia tuzo ya ufalme pia” alisema KP Mjomba na kuongeza;

“Mbali na Aslay na Msagasumu, tutakuwa pia na kundi kongwe la Taarab la Jahazi Modern huku burudani zote hizo ukizipata kwa shilingi 10,000 tu.”

Akizungumza na Risasi Vibes, Aslay alisema;

“Nitawapa mashabiki wangu kile ambacho wamekimis kutoka kwangu, ninazo nyimbo nyingi hadi sasa ambazo zipo kichwani mwa mashabiki wengi kwa hiyo naamini siku hiyo tutakuwa tukiimba pamoja.

“Ukiwa na patna wako hii si ya kukosa kwani nitawabu-rudisha na vibao kama Marioo, Baby, Usiitie Doa, Angekuona, Hauna, Mhudumu, Natamba na vingine vingi.”

Naye Msaga-sumu aliwashukuru waandaaji na kusema;

“Mwanangu mwenyewe wee njoo umependeza, njoo na mtoto wako mzurimzuri uje umsikilize mkali wa Singeli na ngoma za kubembea na mwenzako.”