Diwani Urio  Ashinda Unaibu Meya Kinondoni

Madiwani wa Halmashauri ya Manispaa ya Kinondoni, wamemchagua Michael Urio (Diwani wa Kata ya  Kunduchi), kuwa Naibu Meya Mteule wa Halmashauri ya manispaa hiyo.

Michael Urio ameshinda uchaguzi wa kiti cha Unaibu Meya kwa kura 16  kati ya 26 za wabunge na madiwani wa Kinondoni kwenye uchaguzi uliofanyika leo.

Uchaguzi huo umefanyika ikiwa ni baada ya kumalizika kwa kipindi cha mwaka mmoja cha uongozi wa Naibu Meya aliyekuwa madarakani  Joseph Rwegasira.

Uchaguzi huo wa ndani ya Chama cha Mapinduzi ulihusisha wagombea wawili ambao ni Joseph Rwegasira aliyekuwa akitetea kiti chake na Michael Urio.

Akizungumza baada ya kuibuka mshindi kwenye uchaguzi huo, Urio  alisema;

“Ninawashukuru sana waheshimiwa madiwani kwa kuonyesha imani kubwa kwangu, naomba niwahakikishie kwa kushirikiana na Mstahiki Meya tutahakikisha tunafanyakazi kwa pamoja ili kuwaletea maendeleo wananchi wetu ndani ya Manispaa yetu ya Kinondoni.”

Uchaguzi huo ulisimamiwa na Meya wa Kinondoni  Mnyonge Songoro, ambae alikuwa mwenyekiti wa uchaguzi.

Akizungumza kwa niaba ya Chama cha Mapinduzi, Mwendezi wa CCM Wilaya ya Kinondoni, Lilian Lwebangila alisema chama cha mapinduzi ni wakomavu katika chaguzi na aliwaasa Naibu Meya aliyemaliza muda wake na huyu aliyeshinda kushirikiana katika kuijenga Kinondoni.

Makundi hayakosi ndani ya chaguzi lakini baada ya kumalizika kwa uchaguzi sisi wote ni wamoja alimaliza na kumpongeza Urio kwa kuteuliwa kuwa  Naibu Meya Kinondoni.