Wamevuna Mamilioni ya Watazamaji
TUMEBAKIZA siku chache kuumaliza mwaka 2019. Ni muda muafaka wa kila mtu kujifanyia tathmini ili kuona kama malengo yametimia au la! Kama yalitimia ni jambo jema sasa kuweka mipango mingine, lakini kama hayakutimia ni muda muafaka pia kujipanga upya kwa ajili ya mwaka ujao wa 2020.
Si vibaya kutazama kile wasanii wetu walichopanda na kile walichovuna kwa mwaka huu. Kwenye makala hii tutaangazia wale waliofanikiwa kuvuna mamilioni ya watazamaji kupitia video zao kwenye Mtandao wa Kijamii wa YouTube.
Hapa tutazitazama zile video ambazo zilitoka tangu Januari hadi Desemba, mwaka huu na idadi ya views (watazamaji) zilizopata kuanzia milioni tano na kuendelea;
MY BOO REMIX -HARMO X Q CHILLA
Video hii iliyoongozwa na Director Hanscana. Ilipandishwa kwenye Mtandao wa YouTube, Julai 23, mwaka huu na hadi ninaandika makala hii, juzi ilikuwa na watazamaji zaidi ya milioni 5.5.
NITEKE – HARMO
Ngoma hii inapatikana kwenye EP ya Harmo aliyoachia mwaka huu ya Afro-Bongo. Video hii iliyoongozwa na Director Kenny ilipandishwa YouTube, Machi 26, mwaka huu na hadi juzi ilikuwa na watazamaji zaidi ya milioni 5.9.
MAAJABU – MBOSSO
Video ya ngoma hii iliongozwa na Director Kenny na kuwekwa YouTube, Juni 14, mwaka huu ambapo hadi juzi ilikuwa na watazamaji zaidi ya milioni 6.1.
NEVER GIVE UP – HARMO
Mei 23, mwaka huu ndiyo siku ilipopandishwa YouTube. Video hii imeongozwa na Director Kenny na hadi juzi ilikuwa na watazamaji zaidi ya milioni 7.2.
BABA LAO – MONDI
Video ya Baba Lao ilipandishwa YouTube, Novemba 8, mwaka huu, siku chache kabla ya fainali ya Tamasha la Wasafi Festival jijini Dar. Tangu siku hiyo hadi juzi, video hii iliyoongozwa na Director Kenny imefanikiwa kujikusanyia watazamaji zaidi ya milioni 8.2.
HALLELUJAH – NANDY X WILLY PAUL
Ukiachilia mbali ngoma yao nyingine ya Njiwa ambayo ilitazamwa na wengi, video yao ya Hallelujah iliyotengenezwa na Director Trued waliiachia kwenye YouTube, Machi 29, mwaka huu na hadi juzi ilikuwa na watazamaji zaidi ya milioni 8.7.
ATARUDI – HARMO
Mzigo mwingine wa Harmo ni huu uliowekwa kwenye YouTube, Agosti 19, mwaka huu ukiwa umeongozwa na Director Kenny. Hadi juzi video hii ilikuwa na watazamaji zaidi ya milioni 11.
KANYAGA – MONDI
Video hii iliyoongozwa na Director Kenny na kuwekwa YouTube, Juni 25, mwaka huu, hadi juzi ilikuwa na watazamaji zaidi ya milioni 11.2.
TAMU – MBOSSO
Video nyingine ya Mbosso iliyotisha ni hii ya Tamu iliyotengenezwa na Director Kenny na kupandishwa YouTube, Januari 18, mwaka huu ambapo hadi wikiendi iliyopita ilikuwa na watazamaji zaidi ya milioni 12.
MMMH – RAYVANNY FT WILLY PAUL
Video hii iliyoongozwa na Director Ivan iliwekwa YouTube, Februari 26, mwaka huu na hadi juzi ilikuwa na watazamaji zaidi ya milioni 12.3.
KAINAMA – HARMO X BURNA BOY X MONDI
Hapa walikutana mastaa watatu wakubwa Afrika. Video yao hii iliyoongozwa na Director Kenny ilipandishwa YouTube, Machi 10, mwaka huu na hadi wikiendi iliyopita ilikuwa na watazamaji zaidi ya milioni 12.8.
THE ONE – MONDI
Video hii iliyotengenezwa na Director Kenny iliwekwa YouTube, Aprili 21 na hadi juzi ilikuwa na watazamaji zaidi ya milioni 17.4.
PEPETA – RAYVANNY X NORA FATEHI
Video hii inayomilikiwa na wote iliongozwa na Director Abderrafia na kuwekwa YouTube, Septemba 9, mwaka huu, hadi wikiendi iliyopita ilikuwa na watazamaji zaidi ya milioni 24.
TETEMA – RAYVANNY FT MONDI
Video hii ya jamaa hawa ilikuwa video ya taifa. Iliongozwa na Director Kenny na kuwekwa YouTube, Februari 7, mwaka huu. Hadi wikiendi iliyopita ilikuwa na watazamaji zaidi ya milioni 34.7.
INAMA – MONDI FT FALLY IPUPA
Ni miongoni mwa video za Mondi zenye mafanikio makubwa. Video hii iliyoongozwa na Director Jessica Francois na Director Kenny iliwekwa YouTube, Juni 9, mwaka huu. Hadi wikiendi iliyopita ilikuwa na watazamaji zaidi ya milioni 41.
YOPE REMIX – INNOSS’B FT MONDI
Hii ndiyo video ya mwanamuziki wa Bongo Fleva iliyotazamwa zaidi. Video hii imeongozwa na Director Kenny na kuwekwa YouTube, Septemba 7, mwaka huu. Hadi wikiendi iliyopita ilikuwa imetazamwa na watu zaidi ya milioni 43.
MAKALA: SIFAEL PAUL
