The House of Favourite Newspapers

Waziri Jerry Silaa Awapa Siku 30 Wasiolipa Kodi Ya Pango La Ardhi – Video

0
Waziri wa Ardhi, Nyumba na Maendeleo ya Makazi, Jerry Silaa.

Waziri wa Ardhi, Nyumba na Maendeleo ya Makazi, Jerry Silaa ametoa siku thelathini (30) kwa wamiliki wote wa ardhi wanaodaiwa Kodi ya Pango la Ardhi ambao hawajalipa hadi sasa kulipa kodi husika na baada ya muda huo kupita hatua za kisheria zitachukuliwa dhidi yao.

Waziri Silaa ameyasema hayo Mei 10,  2024 katika Ofisi za Wizara ya Ardhi za Mkoa wa Dar es salaam zilizopo mtaa wa Magogoni jijini Dar es salaam.

Waziri Silaa amesema kuwa kila mmiliki wa ardhi analo jukumu la kulipa kodi ya pango la ardhi kila mwaka amepewa sharti la kulipa Kodi ya Pango la Ardhi kwa kila mwaka kwa mujibu wa Fungu la 33 (1) la Sheria ya Ardhi (Sura ya 113).

Aidha, ameongeza kuwa kwa mujibu wa Fungu la 44 (1) la Sheria ya Ardhi (Sura ya 113), kila mmiliki wa ardhi anatakiwa kutimiza masharti ya umiliki ikiwa ni pamoja na sharti la kulipa Kodi ya Pango la Ardhi.

Silaa amesema Kitendo cha kutolipa Kodi ya Pango la Ardhi ndani ya muda uliowekwa na sheria, kinasababisha mmiliki wa ardhi kuvunja moja ya sharti la umiliki.

Ameongeza kuwa Wizara kwa nyakati tofauti, imekuwa ikihamasisha na kuwakumbusha wamiliki wa ardhi kulipa Kodi ya Pago la Ardhi. Hata hivyo, baadhi ya wamiliki wa ardhi hawajatekeleza wajibu huo wa kisheria.

“Naelekeza wamiliki wote wa ardhi wanaodaiwa Kodi ya Pango la Ardhi, kulipa kodi husika ndani ya siku thelathini (30) kuanzia tarehe ya tangazo hili. Baada ya muda huo kupita, hatua za kisheria zitachukuliwa ikiwa ni pamoja na wamiliki hao watafikishwa mbele ya Mahakama na taratibu za kisheria za ubatilisho wa milki zao zitaendelea” Amesema Silaa.

Silaa amehitimisha kwa kusema kuwa katika kipindi hicho cha siku thelathini (30), vituo vya makusanyo ambavyo ni; Ofisi za Ardhi za Mikoa na Ofisi za Ardhi za Halmashauri zote nchini, kwa siku za kazi zitakuwa wazi hadi muda wa saa 2:00 Usiku. Hivyo, naagiza watendaji wote wa Sekta ya Ardhi, kuratibu mazingira rafiki kwa ajili yakufanikisha utekelezaji wa mkakati huu.

 

View this post on Instagram

 

A post shared by globalpublishers (@globaltvonline)

Leave A Reply