Rais wa Urusi, Vladimir Putin, amesema vita kati ya Urusi na Ukraine inakaribia ukingoni, kauli ambayo imezua mjadala mkubwa duniani kutokana na mazingira ilipotolewa.
Kauli hiyo imekuja saa chache baada ya Urusi kufanya gwaride lake la kila mwaka la Siku ya Ushindi katika Uwanja wa Red Square, tukio ambalo mwaka huu limefanyika kwa muundo tofauti na wa kawaida, likiwa limepunguzwa kwa kiasi kikubwa cha maonyesho ya silaha nzito.
Katika maadhimisho hayo, badala ya kuonesha vifaru na makombora kama ilivyozoeleka, sehemu kubwa ya vifaa vya kijeshi ilionyeshwa kupitia skrini kubwa, hatua iliyotajwa na mamlaka kuwa imechukuliwa kutokana na “hatari za kiusalama.”
Gwaride hilo linaendelea kuonekana kama moja ya matukio muhimu ya kisiasa na kijeshi kwa Urusi, likitumiwa pia kuonesha nguvu ya taifa hilo katika nyakati tofauti.
Akizungumza na waandishi wa habari baada ya tukio hilo, Putin alisema anaamini mzozo huo unaelekea mwisho na akatoa wazo la uwezekano wa mazungumzo ya amani ya moja kwa moja na Rais wa Ukraine, Volodymyr Zelenskyy.
Alisema mkutano huo unaweza kufanyika katika nchi ya tatu baada ya makubaliano ya awali kufikiwa, akisisitiza kuwa hatua hiyo inapaswa kuwa ya mwisho katika kufikia mkataba wa amani wa muda mrefu.
Hata hivyo, Ukraine imekuwa ikipinga wazo la mazungumzo kufanyika Moscow, ikisisitiza masuala ya usalama na mazingira ya kisiasa.
Vita ya Ukraine imeendelea kwa takriban miaka minne, ikiwa na athari kubwa za kibinadamu, kiuchumi na kisiasa barani Ulaya na duniani kwa ujumla.
Wachambuzi wa masuala ya kimataifa wanasema kauli ya Putin inaweza kuashiria mabadiliko ya msimamo wa kidiplomasia, lakini pia inaweza kuwa sehemu ya mkakati wa kisiasa wa kuonesha nia ya amani huku vita ikiendelea.
Kwa sasa, macho ya dunia yanaelekezwa Moscow na Kyiv, yakisubiri iwapo kauli hiyo itafuatiwa na hatua halisi za mazungumzo au itaishia kuwa ujumbe wa kisiasa tu.
