Msanii maarufu wa filamu nchini Tanzania, Aunty Ezekiel, amejitokeza leo Alhamisi Julai 10, 2025 katika ofisi za Bodi ya Filamu Tanzania, kufuatia wito uliotolewa na mamlaka hiyo mapema wiki hii.
Aunty Ezekiel, ambaye ni miongoni mwa mastaa wakubwa kwenye tasnia ya filamu za Bongo, alifika katika ofisi hizo zilizopo jijini Dar es Salaam majira ya asubuhi, ambapo alipokelewa na maofisa wa bodi hiyo kwa ajili ya mazungumzo yaliyodumu kwa muda mfupi.
Hadi sasa, haijafahamika rasmi sababu ya kuitwa kwake na Bodi ya Filamu, lakini vyanzo vya karibu na tasnia vinaeleza kuwa huenda kikao hicho kilihusiana na mambo ya maadili, leseni au usambazaji wa kazi za sanaa mtandaoni, jambo ambalo limekuwa likipewa kipaumbele na bodi hiyo kwa kipindi cha hivi karibuni.
Wadau wa filamu na mashabiki wa Aunty Ezekiel wameonyesha shauku ya kujua kilichojadiliwa, huku wengi wakisubiri taarifa rasmi kutoka kwa msanii huyo au uongozi wa bodi.
