Mjadala kuhusu nafasi ya pesa katika mahusiano ya kimapenzi umeibuka tena kwa mastaa wa Bongo, safari hii ukihusisha mastaa wa A-List Irene Uwoya, Kajala Masanja na Aunty Ezekiel, baada ya kutofautiana mitazamo kuhusu majukumu ya mwanaume na mwanamke ndani ya uhusiano.
Akizungumza katika mazungumzo yao, Irene Uwoya amesisitiza kuwa mwanaume anapaswa kuwa na pesa na kubeba sehemu kubwa ya majukumu katika mahusiano, akieleza kuwa anatakiwa kufanya takribani asilimia 90 ya mambo yanayohusu uhusiano huo.
Uwoya amesema mwanaume anatakiwa kujituma na kupambana kutafuta pesa, akiamini kuwa uwezo wa kifedha una nafasi kubwa katika kuimarisha mahusiano. Kwa mtazamo wake, mapenzi bila pesa yanaweza kuwa magumu, huku akidai kuwa mwanamke anaweza kufikia hatua ya kuchoshwa na mwanaume ambaye hana uwezo wa kifedha.
Hata hivyo, kauli hiyo haikuonekana kukubalika kwa Aunty Ezekiel, ambaye alionyesha kushangazwa na mtazamo wa Uwoya, akisisitiza kuwa majukumu ya kimahusiano hayapaswi kuachwa kwa mwanaume pekee.
Aunty Ezekiel ameeleza kuwa wenza wanapaswa kushirikiana katika kutimiza mahitaji na majukumu yao, badala ya kutegemea upande mmoja kufanya karibu kila kitu. Aidha, ameonyesha mashaka kuhusu upatikanaji wa wanaume wenye uwezo wa kutimiza matarajio yote ya kifedha yanayotajwa na Uwoya.
Tofauti hiyo ya mitazamo imeibua mjadala kuhusu nafasi ya pesa katika mapenzi na namna majukumu yanavyopaswa kugawanywa kati ya wapenzi. Wakati Uwoya akisisitiza umuhimu wa mwanaume kuwa na uwezo wa kifedha na kubeba sehemu kubwa ya majukumu, Aunty Ezekiel anaamini kuwa ushirikiano wa pande zote mbili ni muhimu katika kujenga uhusiano.
Je, unaunga mkono mtazamo wa Irene Uwoya kwamba mwanaume anapaswa kufanya asilimia 90 ya majukumu katika mahusiano, au unaafikiana na Aunty Ezekiel kwamba wapenzi wanapaswa kushirikiana?
