Serikali ya Jamhuri ya Kidemokrasia ya Congo (DRC) imemtuhumu rais wa zamani wa nchi hiyo, Joseph Kabila, kwa madai ya kujaribu kuipindua serikali iliyopo madarakani kwa lengo la kurejea kwenye uongozi wa taifa hilo.
Waziri wa Habari wa DRC ambaye pia ni msemaji wa serikali, Patrick Muyaya, amesema madai ya Kabila kuhusika katika matumizi ya nguvu na silaha yanaashiria nia ya kuvuruga utulivu wa nchi na kukiuka Katiba.
Akizungumzia vuguvugu jipya la waasi linalohusishwa na rais huyo wa zamani, Muyaya amesema licha ya kundi hilo kujaribu kujionyesha kwa sura tofauti, serikali inaelewa nia, mipango na mbinu zake.
Waziri huyo pia amedai kuwa kundi hilo ni muungano wa waasi wanaoshirikiana na Rwanda. Hata hivyo, madai hayo hayajathibitishwa kwa ushahidi huru katika taarifa iliyotolewa.
Muyaya amesema serikali ya DRC inaendelea kujitolea kutafuta suluhu ya mzozo wa usalama unaoikabili nchi hiyo kupitia juhudi za kidiplomasia zinazoendeshwa katika michakato ya Washington na Doha.
Mvutano huo unaibuka wakati DRC ikiendelea kukabiliwa na changamoto za kiusalama zinazohusishwa na makundi ya waasi katika maeneo mbalimbali ya nchi hiyo.
Hadi sasa, taarifa iliyotolewa haijaeleza majibu ya Joseph Kabila kuhusu tuhuma hizo.
