Chama cha Demokrasia na Maendeleo (CHADEMA) kimetangaza kifo cha Alute Mughwai Lissu, ambaye ni kaka wa Mwenyekiti wa Taifa wa chama hicho, Tundu Lissu.
Kwa mujibu wa taarifa iliyotolewa na chama hicho leo Jumapili, Novemba 1, 2026, Alute amefariki dunia alfajiri ya leo akiwa anapatiwa matibabu katika Hospitali ya Rufaa ya Mkoa wa Arusha, jijini Arusha.
CHADEMA kimeeleza kuwa kifo hicho kimetokea katika kipindi kigumu kwa familia ya Lissu, ikiwa ni siku chache kabla ya hukumu ya kesi ya uhaini inayomkabili Tundu Lissu, inayotarajiwa kutolewa Ijumaa, Novemba 6, 2026.
Kupitia taarifa hiyo iliyosainiwa na Mkurugenzi wa Mawasiliano na Uenezi wa CHADEMA, Brenda Rupia, chama hicho kimetoa pole kwa Tundu Lissu, familia, ndugu, jamaa, marafiki, Chama cha Wanasheria Tanganyika (TLS) pamoja na Watanzania wote waliofikwa na msiba huo.
Aidha, CHADEMA kimeeleza kuwa kinaungana na familia katika kipindi hiki cha maombolezo, huku kikiwaombea nguvu, faraja na uvumilivu katika kukabiliana na msiba huo.
Chama hicho kimesema kinaendelea kuwasiliana na familia kuhusu maandalizi na ratiba ya ibada ya mazishi, na kitaendelea kutoa taarifa kadiri kitakavyopokea maelekezo zaidi kutoka kwa familia.
Mwenyezi Mungu ailaze roho ya marehemu mahali pema peponi. Amina.
