Watu wawili wamefariki dunia na mmoja kujeruhiwa katika ajali ya barabarani iliyohusisha gari aina ya Toyota Harrier na pikipiki, iliyotokea Novemba 1, 2026, majira ya saa 5:10 usiku, eneo la Veta, Kata ya Utemini, Wilaya ya Singida.
Taarifa iliyotolewa na Jeshi la Polisi Mkoa wa Singida Novemba 2, 2026, imewataja waliofariki kuwa ni Selemani Athumani Hamis (27), aliyekuwa dereva wa pikipiki, pamoja na Athumani Hamis (53), mkazi wa Kinyangiri, Wilaya ya Mkalama, aliyekuwa abiria kwenye pikipiki hiyo.
Katika ajali hiyo, gari lenye namba za usajili T. 757 EBJ aina ya Toyota Harrier lililokuwa likiendeshwa na Athumani Mkalimoto (42), likigonga pikipiki yenye namba MC 131 FNY aina ya Haojue iliyokuwa ikiendeshwa na Selemani Athumani Hamis.
Uchunguzi wa awali umebaini kuwa chanzo cha ajali hiyo ni uzembe wa dereva wa gari aina ya Toyota Harrier, aliyeshindwa kuchukua tahadhari na kulipita gari lililokuwa mbele yake bila kuhakikisha usalama, na hatimaye kuigonga pikipiki hiyo.
Miili ya marehemu imehifadhiwa katika Hospitali ya Manispaa ya Singida, huku Jeshi la Polisi likitoa wito kwa madereva na watumiaji wengine wa barabara kuzingatia sheria na tahadhari za usalama barabarani ili kuepusha ajali zinazoweza kuzuilika.
