Binti wa Rais wa Kenya, William Ruto, Charlene Chelagat Ruto, amefunga ndoa na kijana wa Kitanzania, Isaya Yunge, katika hafla ya harusi iliyofanyika leo, Ijumaa, Novemba 6, 2026, jijini Mwanza.
Harusi hiyo imewakutanisha viongozi mbalimbali kutoka Kenya na Tanzania, ndugu, jamaa na marafiki wa familia hizo mbili, huku Rais William Ruto akihudhuria akiwa ameambatana na mkewe, Mama Rachel Ruto.
Miongoni mwa matukio yaliyoibua hisia katika hafla hiyo ni Rais Ruto na mkewe kumsindikiza binti yao kuelekea madhabahuni, ambako Charlene na Isaya walibadilishana viapo vya ndoa mbele ya wageni waliohudhuria.
Hafla hiyo ilifanyika katika mazingira yaliyopambwa kwa maua meupe, huku njia maalumu iliyokuwa imepambwa kwa maua na matao ya maua ikitengeneza mandhari ya kuvutia kwa ajili ya sherehe hiyo.
Harusi hiyo imekuwa tukio lenye umuhimu wa kipekee kwa familia hizo mbili, kwani imeunganisha familia ya kiongozi wa juu wa Kenya na familia ya Mtanzania, katika tukio lililovuta hisia za wananchi wa mataifa yote mawili.
Miongoni mwa viongozi na wageni mashuhuri waliohudhuria ni pamoja na viongozi waandamizi wa Serikali ya Kenya, akiwemo Waziri wa Mambo ya Ndani Kipchumba Murkomen, Spika wa Bunge la Kenya Moses Wetang’ula, pamoja na Mbunge wa Kapseret, Oscar Sudi.
Ndoa hiyo ni hatua inayofuata baada ya wawili hao kufanya sherehe ya kimila ya Kalenjin inayojulikana kama Koito, iliyofanyika Agosti 8, 2026, katika shamba la familia ya Rais Ruto lililopo Kilgoris, Kaunti ya Narok nchini Kenya.
Kwa upande wa Isaya Yunge, ni mjasiriamali wa Kitanzania anayejihusisha na sekta ya teknolojia na ubunifu wa kidijitali, huku ndoa hiyo ikiweka sura mpya ya mahusiano ya kifamilia kati ya Tanzania na Kenya.
Tukio hilo limekuwa miongoni mwa harusi zilizovuta hisia kubwa katika ukanda wa Afrika Mashariki kutokana na ushiriki wa familia ya Rais wa Kenya na viongozi mbalimbali wa mataifa hayo mawili.
