Klabu ya Manchester United inakaribia kufikia makubaliano na kocha wa timu ya taifa ya Marekani, Mauricio Pochettino, kuwa kocha wake mkuu mpya iwapo itaamua kumfuta kazi Michael Carrick kutokana na mwenendo usioridhisha wa timu hiyo msimu huu.
Kwa mujibu wa taarifa ya Sky Sports, Pochettino ameandaliwa kuwa mrithi wa Carrick, huku uongozi wa Manchester United ukiendelea kufanya tathmini ya matokeo na mwenendo wa kikosi hicho kabla ya kufanya uamuzi wa mwisho.
Carrick aliripoti katika uwanja wa mazoezi wa Carrington Jumatano asubuhi wakati hatma yake katika klabu hiyo ikiwa bado haijajulikana.
Taarifa zinaeleza kuwa Manchester United italazimika kulipa TSh bilioni 24 ili kuvunja mkataba wa Pochettino na Shirikisho la Soka la Marekani, ambako kwa sasa anahudumu kama kocha wa timu ya taifa.
Hata hivyo, kiasi hicho cha fedha hakionekani kuwa kikwazo kikubwa kwa Manchester United katika mipango yake ya kumrejesha kocha huyo katika Ligi Kuu England.
Kwa upande mwingine, hakuna uamuzi rasmi ambao umeshatangazwa kuhusu hatma ya Carrick, huku Mtendaji Mkuu wa klabu hiyo, Omar Berrada, pamoja na Mkurugenzi wa Soka, Jason Wilcox, wakitarajiwa kukutana na mmiliki mwenza Sir Jim Ratcliffe mjini Monaco Jumatano kujadili hatua zinazofuata.
Mkutano huo unatarajiwa kujikita katika tathmini ya mwenendo wa timu na mapendekezo kuhusu nafasi ya kocha mkuu.
Pochettino, ambaye amewahi kuzifundisha Tottenham Hotspur, Chelsea na Paris Saint-Germain, anaripotiwa kuwa tayari kuzungumza na Manchester United endapo klabu hiyo itaamua kufanya mabadiliko ya benchi la ufundi.
Kocha huyo wa Argentina hivi karibuni aliongeza mkataba wake na timu ya taifa ya Marekani hadi mwaka 2030.
Shinikizo dhidi ya Carrick limeongezeka baada ya Manchester United kushindwa kushinda mechi nane mfululizo za Ligi Kuu England, huku sare ya mabao 4-4 dhidi ya Aston Villa ikizidisha maswali kuhusu mwenendo wa kikosi hicho.
Kwa sasa, macho ya mashabiki wa Manchester United yanaelekezwa katika mkutano wa viongozi wa klabu hiyo mjini Monaco, ambao unaweza kuwa na mchango mkubwa katika kuamua mustakabali wa Carrick na uwezekano wa Pochettino kurejea katika soka la England.
Hata hivyo, hadi sasa Manchester United haijathibitisha kumfuta kazi Carrick wala kumtangaza Pochettino kuwa kocha wake mpya.
