LINDI: Makamu wa Rais wa Jamhuri ya Muungano wa Tanzania, Deogratius Ndejembi, amekagua maendeleo ya ujenzi wa Kampasi ya Chuo Kikuu cha Dar es Salaam (UDSM) mkoani Lindi, huku akieleza kuridhishwa na hatua iliyofikiwa katika utekelezaji wa mradi huo.
Katika ziara hiyo, Makamu wa Rais amepokelewa na Mkuu wa Chuo Kikuu cha Dar es Salaam na Rais Mstaafu wa Awamu ya Nne, Dkt. Jakaya Mrisho Kikwete, pamoja na Waziri wa Elimu, Sayansi na Teknolojia, Prof. Adolf Mkenda.
Viongozi wengine waliohudhuria ni Naibu Makamu Mkuu wa Chuo anayeshughulikia Taaluma, Prof. Rose Acen Upor, pamoja na Naibu Mratibu wa Mradi wa Elimu ya Juu kwa Mageuzi ya Kiuchumi (HEET) wa UDSM, Prof. Liberato Venant Haule.
Akiwasilisha taarifa ya maendeleo ya ujenzi huo, Prof. Haule amesema kuwa utekelezaji wa awamu ya kwanza ya mradi umefikia asilimia 98, hatua inayoiweka kampasi hiyo katika maandalizi ya kuanza kupokea wanafunzi.
Amesema kampasi hiyo inatarajia kuanza kudahili wanafunzi 360 kuanzia Machi 2027, ambapo itatoa mafunzo ya ngazi ya astashahada na stashahada katika fani zinazohusiana na uzalishaji na uchakataji wa mazao ya kilimo na mifugo.
Mafunzo hayo yanatarajiwa kuwa sehemu ya juhudi za kuimarisha elimu ya ufundi na ujuzi katika sekta za kilimo na mifugo, ambazo ni muhimu katika shughuli za uzalishaji na uchumi.
Akizungumza baada ya kupokea taarifa na kukagua miundombinu ya kampasi hiyo, Makamu wa Rais amepongeza usimamizi wa mradi unaotekelezwa kupitia Mpango wa Elimu ya Juu kwa Mageuzi ya Kiuchumi (HEET).
Aidha, ameiagiza Wizara ya Elimu, Sayansi na Teknolojia kuangalia uwezekano wa kuipa kipaumbele Kampasi ya Lindi katika awamu ya pili ya mradi wa HEET, hususan katika ujenzi wa nyumba za walimu na wafanyakazi.
Ujenzi wa kampasi hiyo unatarajiwa kuongeza fursa za upatikanaji wa elimu ya juu na mafunzo ya kitaalamu kwa vijana wa Lindi na maeneo mengine ya kusini mwa Tanzania.
Kampasi hiyo pia inalenga kuimarisha upatikanaji wa wataalamu wenye ujuzi katika uzalishaji na uchakataji wa mazao ya kilimo na mifugo, hatua inayoweza kuchangia kuongeza thamani ya bidhaa na kuimarisha shughuli za kiuchumi nchini.
