×

XI na Putin Waungana Kuikosoa Magharibi, Trump Awasili China

Rais wa China, Xi Jinping, na Rais wa Urusi, Vladimir Putin, wamekosoa vikali sera za vikwazo vya kiuchumi na vizuizi vya biashara vinavyowekwa na mataifa ya Magharibi, huku Rais wa Marekani, Donald Trump, akiwasili nchini China kwa mkutano muhimu wa viongozi hao watatu.

Akizungumza Jumatano, Novemba 18, 2026, katika mkutano wa kilele wa Ushirikiano wa Kiuchumi wa Asia na Pasifiki (APEC) uliofanyika Shenzhen, China, Xi alisisitiza umuhimu wa kulinda mfumo wa biashara huria na uwekezaji wa wazi kati ya mataifa.

Xi amesema China itaendelea kupinga sera za kujilinda kiuchumi na hatua za upande mmoja zinazoweza kuathiri mfumo wa biashara wa kimataifa, akieleza kuwa mataifa yanapaswa kuheshimu kanuni za Shirika la Biashara Duniani (WTO).

Kauli yake imekuja wakati Marekani ikitangaza vikwazo vipya vinavyolenga kuzuia China kupata teknolojia za kisasa za kutengeneza na kutumia chip za Akili Bandia (AI), ikiwemo bidhaa zinazotengenezwa na kampuni ya Nvidia.

China imekuwa ikionya kuwa inaweza kuchukua hatua za kujibu vikwazo hivyo, hali inayozidi kuweka changamoto katika uhusiano wa kibiashara kati ya mataifa hayo mawili yenye uchumi mkubwa duniani.

Kwa upande wake, Rais wa Urusi, Vladimir Putin, amekosoa vikwazo vya kiuchumi vilivyowekwa dhidi ya nchi yake kufuatia vita vinavyoendelea nchini Ukraine, akidai kuwa hatua hizo hazijafanikiwa kuzuia ukuaji wa uchumi wa Urusi.

Putin ameyataja mataifa ya Magharibi kuwa ‘mataifa yaliyopoteza nguvu ya kutawala dunia’ na kueleza kuwa sera za vikwazo, ushuru na vizuizi vya mauzo ya teknolojia haziwezi kusimamisha maendeleo ya washindani wao wa kiuchumi.

Wakati viongozi hao wakitoa kauli hizo, Trump aliwasili nchini China na kupokelewa na mwenyeji wake Xi Jinping katika Uwanja wa Ndege wa Shenzhen, ambapo viongozi hao walionekana kusalimiana kwa furaha kabla ya kuelekea katika shughuli za mkutano wa APEC.

Ziara hiyo inatarajiwa kufuatiwa na mazungumzo ya pande tatu kati ya Xi, Trump na Putin siku ya Alhamisi, Novemba 19, 2026, ambapo masuala mbalimbali ya kimataifa yanatarajiwa kujadiliwa, yakiwemo vita vya Ukraine, mgogoro wa Marekani na Iran, biashara ya kimataifa, teknolojia ya Akili Bandia na silaha za nyuklia.

Mkutano huo umevutia hisia za mataifa mbalimbali kutokana na ushiriki wa viongozi wa nchi tatu zenye ushawishi mkubwa katika masuala ya uchumi na usalama wa kimataifa.

Baadhi ya mataifa ya Ulaya na Asia yameeleza wasiwasi kuhusu uwezekano wa makubaliano makubwa kati ya mataifa hayo kuathiri maslahi ya nchi ndogo, hali inayokumbusha Mkutano wa Yalta wa mwaka 1945 uliohusisha Marekani, Uingereza na Umoja wa Kisovieti katika kupanga mfumo wa dunia baada ya Vita Kuu ya Pili ya Dunia.

Aidha, mkutano huo unafanyika wakati mvutano kati ya China na Japan ukiendelea, kufuatia kauli za Waziri Mkuu wa Japan, Sanae Takaichi, kuhusu uwezekano wa nchi yake kutumia jeshi endapo hatua za China dhidi ya Taiwan zitatishia usalama wa Japan.

Hata hivyo, Xi amesisitiza kuwa China itaendelea kufungua zaidi soko lake, kupunguza ushuru wa forodha na kuwekeza katika viwanda na teknolojia mpya, huku ikipinga kile alichokiita kujilinda kiuchumi na matumizi ya nguvu katika mahusiano ya kimataifa.

Kwa sasa, macho ya dunia yanaelekezwa Shenzhen, ambako mkutano wa viongozi hao watatu unatarajiwa kuwa na nafasi muhimu katika kujadili mustakabali wa biashara, usalama na mahusiano ya kimataifa.

Leave a Comment