Mshambuliaji wa Tabora United na timu ya taifa ya Tanzania, Offen Francis Chikola (26), yupo mbioni kutua katika klabu ya Yanga SC.
Kwa mujibu wa vyanzo vya karibu na mchezaji huyo, mazungumzo baina ya Chikola na uongozi wa Yanga SC yako katika hatua za mwisho, na inaelezwa kuwa tayari pande zote zimefikia makubaliano ya awali kuhusu mkataba wa miaka miwili.
Chikola ambaye alitoa mchango mkubwa kwa Tabora United msimu uliopita kwa kufunga magoli 8 kwenye Ligi Kuu Tanzania Bara, amekuwa kivutio kikubwa kwa klabu kadhaa kutokana na uwezo wake wa kucheza kwa kasi, kupenya ngome za wapinzani na kumalizia kwa usahihi.
Iwapo dili hili litakamilika, Yanga SC itakuwa imeongeza nguvu mpya katika safu ya ushambuliaji, jambo linaloweza kuleta ushindani mzuri ndani ya kikosi hicho kuelekea msimu ujao wa mashindano ya ndani na kimataifa.
Kwa sasa, hakuna tamko rasmi kutoka kwa Yanga wala kwa Chikola, lakini dalili zote zinaonesha kuwa jezi ya kijani na njano inaweza kuwa makazi mapya ya mshambuliaji huyo.
