Rais wa Shirikisho la Mpira wa Kikapu Tanzania (TBF), Hasheem Thabeet, amemkabidhi jezi maalumu ya timu ya kikapu ya Dar City gwiji wa soka Rio Ferdinand katika tukio lililofanyika jijini Dar es Salaam, ikiwa ni ishara ya kuanza kwa ushirikiano mpana unaolenga kukuza mchezo wa kikapu nchini na kuimarisha mahusiano ya kimichezo kati ya mataifa.
Tukio hilo limebeba dhamira ya pamoja ya kuendeleza maendeleo ya michezo kupitia programu shirikishi zinazolenga kuibua na kukuza vipaji vya vijana, kuimarisha miundombinu ya mafunzo ya michezo, pamoja na kuwezesha matumizi ya teknolojia katika maendeleo ya wanamichezo. Pia, mkazo umewekwa katika programu za kubadilishana uzoefu wa kimataifa.
Katika mazungumzo yao, Ferdinand na Thabeet walijadili mikakati ya kisasa ya kukuza vipaji, kuanzisha kliniki za michezo, pamoja na kuweka mifumo endelevu ya mafunzo itakayosaidia vijana kupata fursa zaidi za kitaifa na kimataifa.
Hatua hiyo imepokelewa kwa mtazamo chanya na Waziri wa Habari, Utamaduni, Sanaa na Michezo Paul Makonda, ambaye ameitaja kama hatua muhimu katika kuinua viwango vya michezo nchini kupitia ushirikiano wa kitaalamu na kimataifa.
Kwa ujumla, mpango huo unatarajiwa kufungua milango mipya ya uwekezaji na maendeleo ya mchezo wa kikapu nchini Tanzania, sambamba na kuongeza nafasi za vijana kushiriki na kufaidika na fursa za michezo katika ngazi ya kitaifa na kimataifa.
