Rais wa Marekani, Donald Trump, amesema vikosi vya kijeshi vya Marekani vimemuua Héctor Rusthenford Guerrero Flores maarufu kama Niño Guerrero, kiongozi wa genge la uhalifu la Tren de Aragua, katika operesheni maalum iliyofanyika nchini Venezuela.
Kwa mujibu wa Trump, shambulio hilo lilitekelezwa kwa ushirikiano wa karibu na mamlaka za Venezuela, huku video ya operesheni hiyo ikionyeshwa kupitia mtandao wake wa Truth Social. Serikali ya Venezuela nayo imethibitisha kuwa Guerrero aliuawa katika operesheni ya pamoja iliyolenga kuvunja mtandao wa uhalifu wa genge hilo.
Niño Guerrero alikuwa kiongozi wa muda mrefu wa genge la Tren de Aragua, ambalo limekuwa likihusishwa na uhalifu wa kimataifa ukiwemo biashara ya dawa za kulevya, ulanguzi wa binadamu, utakatishaji fedha na mauaji katika nchi kadhaa za Amerika Kusini.
Marekani imekuwa ikilitaja genge hilo kama shirika la kigaidi la kigeni na iliwahi kutangaza zawadi ya dola milioni 5 kwa taarifa zitakazosaidia kukamatwa kwa Guerrero.
Aidha, mwezi Januari mwaka huu, Guerrero alitajwa katika hati ya mashtaka ya Marekani dhidi ya aliyekuwa rais wa Venezuela, Nicolás Maduro, akidaiwa kuwa mmoja wa washirika katika mtandao wa uhalifu uliokuwa ukichunguzwa na mamlaka za Marekani.
Kifo chake kinachukuliwa kuwa pigo kubwa kwa Tren de Aragua, moja ya magenge yenye ushawishi mkubwa zaidi katika eneo la Amerika Kusini.
