Nyota wa soka wa Brazil, Neymar Jr, ametangaza rasmi kuwa safari yake ya kuitumikia timu ya taifa ya Brazil imefikia ukingoni, kufuatia kuondolewa kwa nchi yake katika Kombe la Dunia la FIFA 2026.
Brazil ilitolewa kwenye hatua ya 16 bora baada ya kupoteza dhidi ya Norway, katika mchezo uliochezwa kwenye Uwanja wa MetLife, New Jersey, ambapo Neymar aliingia kama mchezaji mbadala dakika ya 67 huku timu yake ikiwa nyuma kwa mabao 2-0.
Licha ya juhudi zake, Neymar alifanikiwa kufunga penalti katika muda wa nyongeza, lakini hilo halikutosha kuizuia Brazil kuaga mashindano.
Akizungumza kwa hisia kali kupitia TV Globo, Neymar alisema: “Nilijaribu, nilijaribu. Sasa nimefikia mwisho. Nilianza hapa, namalizia hapa.”
Nyota huyo mwenye umri wa miaka 34 ameweka historia kubwa akiwa na Brazil, akiwa mfungaji bora wa muda wote wa taifa hilo kwa mabao 80, na akicheza mechi 130 za kimataifa, akikaribia rekodi ya Cafu aliyeshiriki mechi 142.
Neymar alicheza Kombe la Dunia kwa mara ya nne, akishiriki mashindano ya 2014, 2018, 2022 na 2026, ambapo amekuwa mmoja wa wachezaji waliobeba matumaini makubwa ya taifa hilo kwa zaidi ya muongo mmoja.
Safari yake ya kimataifa ilianza kwa kishindo mwaka 2010 katika uwanja huo huo wa MetLife, ambapo alifunga bao katika ushindi wa 2-0 dhidi ya Marekani, na sasa inamalizika katika uwanja huo huo kama alivyosema mwenyewe, mwanzo na mwisho wa hadithi yake ya Brazil.
Kuondoka kwake kunaacha pengo kubwa katika kikosi cha Brazil na kufungua ukurasa mpya wa kizazi kipya cha soka nchini humo.
