Mapigano kati ya Marekani na Iran yameingia katika hatua mpya ya hatari baada ya pande zote mbili kuanza kushambulia miundombinu muhimu, hali inayoongeza hofu ya vita hivyo kusambaa zaidi katika eneo la Mashariki ya Kati.
Kwa mujibu wa taarifa, jeshi la Marekani lilifanya mashambulizi Ijumaa dhidi ya madaraja kadhaa na uwanja wa ndege nchini Iran, likisema lililenga miundombinu ya kijeshi na vifaa vya usafirishaji vinavyotumiwa na jeshi la Iran.
Vyombo vya habari vya serikali ya Iran vilidai kuwa angalau madaraja matano katika maeneo ya kusini mwa nchi yaliharibiwa, huku watu saba wakiripotiwa kufariki katika mashambulizi yaliyofanyika Bandar Khamir. Pia kulikuwa na taarifa za mashambulizi kwenye uwanja wa ndege wa Iranshahr na maeneo mengine ya Bandar Abbas.
Iran ilitangaza kushambulia nchi za Ghuba zinazohifadhi kambi za kijeshi za Marekani, zikiwemo Kuwait, Qatar na Bahrain.
Mamlaka za Kuwait zilisema shambulio la Iran lilipiga kituo cha kuzalisha umeme na kusafisha maji ya bahari, na kusababisha moto pamoja na kuathiri baadhi ya mitambo ya uzalishaji wa umeme. Timu za zimamoto zilifanikiwa kudhibiti moto huo huku mafundi wakianza tathmini ya uharibifu na juhudi za kurejesha huduma.
Wakati huo huo, mvutano umeendelea kuongezeka katika Mlango wa Bahari wa Hormuz (Strait of Hormuz), ambapo jeshi la Marekani lilisema wanamaji wake walipanda kwenye meli ya mafuta kutekeleza hatua za kuzuia usafirishaji wa bidhaa kutoka Iran. Pia kulikuwa na taarifa za meli nyingine kushambuliwa karibu na Yemen, ingawa vyanzo vya usalama vilisema tukio hilo linaonekana kuhusishwa na maharamia wa Somalia badala ya vita vya Iran.
Kuongezeka kwa mashambulizi hayo kumepandisha bei ya mafuta ghafi aina ya Brent kwa takribani asilimia mbili, kufikia karibu dola 86 kwa pipa, huku hofu ya kuvurugika kwa usambazaji wa nishati duniani ikiongezeka.
Mvutano huo umeongezeka tangu makubaliano ya kusitisha mapigano kati ya Marekani na Iran yalipovunjika wiki iliyopita, na sasa kuna hofu kwamba pande hizo zinaweza kurejea kwenye vita kamili iwapo mashambulizi dhidi ya miundombinu muhimu yataendelea.
