Mvutano kati ya Iran na Marekani umeendelea kuongezeka baada ya kiongozi mwandamizi wa kijeshi wa Iran, Meja Jenerali Mohsen Rezaei, kuonya kuwa Tehran itaanzisha operesheni kamili za kijeshi iwapo mashambulizi ya Marekani yataendelea kwa siku chache zijazo.
Rezaei, ambaye ni mshauri wa kijeshi wa kiongozi mkuu wa Iran na aliyewahi kuongoza Jeshi la Walinzi wa Mapinduzi (IRGC), amesema Iran haitajizuia tena kujibu mashambulizi kwa kiwango sawa.
“Ikiwa mashambulizi ya Marekani yataendelea kwa siku kadhaa zaidi, tutaingia katika hatua ya operesheni kamili za kushambulia. Iran haitajifunga tena kwenye mashambulizi ya kulipiza kisasi pekee, na hakuna mpaka wa kisiasa utakaokuwa salama,” alisema Rezaei kupitia vyombo vya habari vya Iran.
Kauli hiyo imetolewa saa chache kabla ya Iran kuripotiwa kushambulia malengo ya kijeshi ya Marekani nchini Kuwait na Jordan.
Jeshi la Marekani limesema limemaliza usiku wa saba wa mashambulizi dhidi ya Iran, yakilenga maeneo ya ufuatiliaji wa kijeshi, miundombinu ya usafirishaji wa vifaa vya kijeshi, maghala ya silaha yaliyoko chini ya ardhi pamoja na uwezo wa kijeshi wa majini.
Aidha, Pentagon imesema inaendelea kutekeleza vizuizi vya majini dhidi ya bandari za Iran.
Kamandi Kuu ya Jeshi la Marekani Mashariki ya Kati (CENTCOM) imesema zaidi ya wanajeshi 50,000 wa Marekani waliopo katika eneo hilo wako tayari kukabiliana na hali yoyote ya kiusalama.
