Paris, Ufaransa – Kombe la Dunia 2026 limevutia zaidi wapenzi wa soka na wafuatiliaji wa ubashiri kuliko matoleo yaliyopita, huku idadi ya tiketi za ubashiri ikiongezeka kwa zaidi ya asilimia 80 ikilinganishwa na michuano ya mwaka 2022.
Kwa mujibu wa mtaalamu wa masuala ya ubashiri, Darren Small, ambaye ni Makamu wa Rais Mwandamizi wa Huduma za Usimamizi wa Biashara katika kampuni ya teknolojia ya michezo Sportradar, ongezeko hilo limeonekana licha ya mashaka ya awali kuhusu kupanuliwa kwa michuano hiyo kutoka timu 32 hadi 48.
“Tumeona ongezeko la asilimia 80 katika idadi ya tiketi za ubashiri. Hivyo tunaona dau nyingi zaidi na wateja wengi zaidi wanaoshiriki,” alisema Small.
Amesema idadi hiyo imevuka matarajio yao, hasa ukilinganisha na Kombe la Dunia 2022 ambalo lilikuwa na mazingira tofauti kutokana na kufanyika kipindi cha majira ya baridi.
Kwa mchezo wa fainali kati ya Hispania na mabingwa watetezi Argentina, Small ametabiri kuwa kampuni hiyo itashughulikia takribani tiketi milioni 8.5 za ubashiri kupitia kampuni 250 za ubashiri duniani.
England Yaongoza Kwa Wingi wa Ubashiri
Licha ya England kushindwa kufika fainali na kusubiri tena kwa miaka minne kujaribu kutwaa taji la pili la Kombe la Dunia tangu mwaka 1966, timu hiyo ndiyo iliyoongoza kwa kuvutia dau nyingi zaidi.
Timu nne zilizofika hatua ya nusu fainali ambazo pia ni timu nne bora kwa viwango vya FIFA ndizo zilizovutia zaidi mashabiki wa ubashiri.
England iliongoza kwa takribani tiketi milioni 16.3, ikifuatiwa na:
- Ufaransa – tiketi milioni 15.5
- Argentina – tiketi milioni 15
- Hispania – tiketi milioni 14.5
Michezo iliyokuwa na idadi kubwa zaidi ya tiketi za ubashiri ilikuwa:
- Argentina kuifunga England 2-1 katika nusu fainali – tiketi milioni 5.8
- England kuifunga Norway 2-1 katika robo fainali – tiketi milioni 5.7
- Hispania kuifunga Ufaransa 2-0 katika nusu fainali – tiketi milioni 5.3
Timu Ndogo Zazua Mshangao
David Stevens, Mkuu wa Mahusiano kwa Umma wa kampuni ya ubashiri ya Coral, amesema hofu yao kuhusu kupanuliwa kwa michuano hiyo iliondolewa baada ya hatua ya makundi kuleta matokeo mengi yasiyotabirika.
Amesema awali kulikuwa na hofu kuwa timu kubwa zingekuwa na ushindi rahisi dhidi ya timu ndogo, lakini hali hiyo haikutokea.
Miongoni mwa timu zilizovutia zaidi ni Cape Verde, ambayo iliweza kutoa upinzani mkubwa dhidi ya Argentina kabla ya kupoteza kwa mabao 3-2 baada ya muda wa nyongeza.
Ubashiri Waongezeka Kwa Masoko Mengi
Sportradar imeeleza kuwa ongezeko la ubashiri limechangiwa pia na kuongezeka kwa aina mbalimbali za masoko ya kubashiri, ambapo mashabiki hawatabiri tena mshindi pekee bali pia matukio mbalimbali ndani ya mchezo.
Mfano, mashabiki wanaweza kubashiri mchezaji kufunga kwa mguu fulani, muda wa bao kufungwa, idadi ya kona au hata pasi za mwisho.
Hata hivyo, baadhi ya wadau wameonyesha wasiwasi kuhusu wazo la FIFA kupanua zaidi Kombe la Dunia hadi timu 64.
Stevens amesema ingawa upanuzi wa sasa umefanikiwa, kuna hatari ya mashabiki kuchoka kutokana na kuongezeka kwa idadi ya michezo.
“Lazima kuwe na kiwango ambacho mashabiki na wafuatiliaji wa ubashiri wanaweza kusema imetosha. Timu 64 zinaweza kuwa hatua hiyo,” alisema.
Pamoja na hayo, kutokana na ushawishi wa Rais wa FIFA Gianni Infantino, baadhi ya wachambuzi wanaamini wazo hilo linaweza kutekelezwa siku zijazo.
