Hispania imeibuka bingwa wa Kombe la Dunia la FIFA 2026 baada ya kuifunga Argentina bao 1-0 katika fainali iliyochezwa usiku wa Julai 19, 2026, kwenye Uwanja wa MetLife, East Rutherford, New Jersey, Marekani.
Bao pekee la ushindi lilifungwa na Ferran Torres katika dakika ya 106 ya muda wa nyongeza, baada ya kuingia akitokea benchi.
Torres alitumia vizuri mpira ulioruka ndani ya eneo la hatari na kuupiga kwa mguu wa kushoto, ukitinga wavuni na kuipa Hispania taji lake la pili la Kombe la Dunia tangu ilipotwaa ubingwa huo mwaka 2010.
Ushindi huo ulihitimisha utetezi wa taji la Argentina na kumzuia nahodha Lionel Messi kutwaa ubingwa wa pili mfululizo wa Kombe la Dunia katika kile alichoashiria kuwa huenda kikawa mchezo wake wa mwisho katika mashindano hayo.
“Ni bao lililofungwa na watu milioni 47,” alisema Torres akimaanisha idadi ya wananchi wa Hispania, akieleza furaha ya kuipa nchi yake ubingwa huo.
Messi, ambaye alionekana akitokwa na machozi baada ya kupokea medali ya mshindi wa pili, alikiri kuwa Hispania ilikuwa bora zaidi. “Nina huzuni, lakini walikuwa bora, ukweli ni huo,” alisema nyota huyo wa Argentina.
Licha ya matokeo ya 1-0 kuonyesha mchezo ulikuwa wa karibu, Hispania ilitawala kwa kiasi kikubwa mchezo huo.
Ilipiga mashuti 20 kabla ya Argentina kupata jaribio lake la kwanza katika kipindi cha pili cha muda wa nyongeza, huku kipa Emiliano Martinez akiokoa mara 12 na kuiweka Argentina kwenye mchezo kwa muda mrefu.
Katika mashindano yote, Hispania iliruhusu kufungwa bao moja pekee katika michezo minane, rekodi mpya kwa bingwa wa Kombe la Dunia. Pia imefikisha mechi 38 mfululizo bila kupoteza, ikiwa na ushindi 29 na sare tisa, rekodi ndefu zaidi kuwahi kuwekwa na taifa la Ulaya.
Kocha wa Hispania, Luis de la Fuente mwenye umri wa miaka 65, ameweka historia kwa kuwa kocha mwenye umri mkubwa zaidi kuiongoza timu kutwaa Kombe la Dunia. Alisema mafanikio hayo yametokana na umoja wa kikosi chake.
Mwisho wa mchezo kulikuwa na mvutano mfupi kati ya wachezaji wa pande zote mbili, lakini hali ilitulia haraka na wachezaji wa Hispania waliwasalimia wapinzani wao kwa heshima walipokuwa wakielekea kupokea medali za mshindi wa pili.
Argentina ilimaliza mchezo ikiwa na wachezaji 10 baada ya Enzo Fernández kutolewa kwa kadi nyekundu kufuatia kupata kadi ya pili ya njano mwishoni mwa mchezo kwa kumchezea vibaya Pau Cubarsí.
Fainali hiyo ilihitimisha Kombe la Dunia la kwanza lenye timu 48, lililofanyika Marekani, Canada na Mexico, huku likiwa na jumla ya mechi 104 na zaidi ya mabao 300 yakifungwa katika mashindano hayo. Pia kwa mara ya kwanza katika historia ya FIFA, kulikuwa na burudani ya mapumziko ya kipindi cha kwanza (halftime show), huku mastaa mbalimbali wa filamu, muziki na michezo wakihudhuria kushuhudia fainali hiyo.
