Nyota wa muziki kutoka Afrika Kusini, Tyla, ameendelea kung’ara kimataifa baada ya wimbo wake kuchaguliwa na aliyekuwa Rais wa Marekani, Barack Obama, kuwa sehemu ya orodha yake ya nyimbo alizozipenda kwa msimu wa kiangazi 2026.
Obama aliuchagua wimbo wa Tyla unaoitwa “She Did It Again” akishirikiana na Zara Larsson, katika playlist yake yenye karibu nyimbo 50, ambayo aliielezea kuwa ni mkusanyiko wa muziki aliokuwa akiufurahia kipindi cha kiangazi.
Tyla si msanii pekee mwenye asili ya Afrika aliyepata nafasi kwenye orodha hiyo, kwani pia amejumuishwa msanii wa Ethiopia-Marekani Kelela kupitia wimbo “Idea 1”, pamoja na nyota wa Uingereza mwenye asili ya Ghana, RAYE, kupitia wimbo “Where Is My Husband!”
Playlist hiyo imejumuisha mchanganyiko wa aina mbalimbali za muziki kutoka kwa wasanii wakubwa kama Drake, SZA, Doechii, Coldplay, pamoja na nyimbo za kihistoria kutoka kwa The Beatles na David Bowie.
Hii si mara ya kwanza kwa Tyla kupata nafasi kwenye orodha ya muziki ya Obama, kwani mwaka 2024 pia alijumuishwa kupitia wimbo wake mkubwa wa kimataifa “Jump”.
Uteuzi huo unaendelea kuwa hatua nyingine kubwa katika safari ya Tyla, ambaye amekuwa miongoni mwa wasanii wa Afrika wanaowakilisha vyema muziki wa bara hilo katika jukwaa la kimataifa.
