Kiongozi mkongwe wa upinzani nchini Uganda, Dk. Kizza Besigye, amerudishwa katika Gereza la Luzira kutoka Hospitali ya Taifa ya Rufaa ya Mulago, hatua ambayo imezua malalamiko kutoka kwa familia yake na wafuasi wake wa kisiasa.
Besigye, ambaye amewahi kugombea urais mara nne, alilazwa hospitalini baada ya kuanguka akiwa mahakamani Julai 29, wakati akiendelea na kesi yake ya uhaini.
Kwa mujibu wa familia yake, hali yake bado ilikuwa dhaifu na hakuweza kutembea wala kuzungumza vizuri aliporejeshwa gerezani.
Kwa mujibu wa The Monitor, mke wake, Winnie Byanyima, amesema madaktari walikuwa na wasiwasi kuhusu hali ya Besigye. Pia amesema maafisa wa magereza waliwahi kueleza kuwa Gereza la Luzira halikuwa na uwezo wa kutoa huduma za afya alizokuwa akihitaji.
Byanyima amesema uamuzi wa kumrudisha gerezani ulifuatia ziara ya Waziri wa Afya, Chris Baryomunsi, hospitalini.
Hata hivyo, Baryomunsi alisema baada ya kumtembelea Besigye kuwa mwanasiasa huyo alikuwa akiendelea kuimarika, akimtakia apone haraka.
Kauli hiyo inapingana na madai ya familia yake pamoja na chama chake, People’s Front for Freedom (PFF), ambacho kimetaka aachiliwe na kupelekwa nje ya nchi kwa ajili ya matibabu maalumu.
Besigye anashikiliwa kwa tuhuma za uhaini na kushindwa kutoa taarifa kuhusu njama ya uhaini, pamoja na washtakiwa wengine wawili.
Serikali inamtuhumu kupanga njama ya kuipindua serikali kwa nguvu kati ya mwaka 2023 na Novemba 2024.
Kesi yake ilihamishiwa Mahakama Kuu baada ya Mahakama ya Juu kuamua kuwa raia hawapaswi kushtakiwa katika mahakama za kijeshi, ambako alikuwa akiendesha kesi yake awali.
