LUSAKA, ZAMBIA: Zambia iko tayari kwa uchaguzi mkuu unaofanyika kesho, Alhamisi, Agosti 13, 2026, ambapo wananchi watapiga kura kumchagua Rais, wabunge pamoja na viongozi wa serikali za mitaa.
Kwa mujibu wa ratiba rasmi ya Tume ya Uchaguzi ya Zambia (ECZ), Agosti 13 ndiyo siku ya upigaji kura nchini humo.
Uchaguzi huo unamkutanisha Rais Hakainde Hichilema akitafuta muhula wa pili madarakani. Kampeni zimejikita zaidi katika masuala ya uchumi, gharama za maisha na namna ambavyo mageuzi ya kiuchumi yaliyofanywa na serikali yake yamewanufaisha wananchi.
Hata hivyo, wananchi pia wanatarajia kuona maboresho zaidi katika huduma za kijamii, pamoja na mageuzi yanayolenga kuboresha maisha yao katika maeneo ya mijini na vijijini.
Vyama vya upinzani vimekuwa vikijaribu kutumia changamoto za kiuchumi na gharama za maisha kuwavutia wapiga kura, huku uchaguzi huo ukitarajiwa kuwa kipimo muhimu kwa serikali ya Hichilema baada ya muhula wake wa kwanza.
Tume ya Uchaguzi ya Zambia imesema zoezi la kupokea na kuhakiki matokeo litaanza Agosti 15 na kuendelea hadi Agosti 17. Utangazaji wa matokeo ya uchaguzi unatarajiwa kuanza rasmi Agosti 17, 2026.
Wakati huo huo, mazingira ya kisiasa, uhuru wa uchaguzi na haki za binadamu yameendelea kuwa miongoni mwa masuala yanayofuatiliwa kwa karibu kuelekea siku ya kupiga kura.
Kwa mamilioni ya Wazambia, uchaguzi huo utakuwa fursa ya kuamua iwapo Rais Hakainde Hichilema na chama chake wataendelea kuongoza nchi kwa muhula mwingine, au ikiwa wapinzani wataweza kuleta mabadiliko katika uongozi wa taifa hilo.
Macho yote sasa yanaelekezwa Zambia, huku wananchi wakijiandaa kutumia kura zao kuamua mustakabali wa nchi hiyo.
