Tehran, Iran — Iran imeishutumu Qatar kwa kuwashikilia marubani wake watatu waliodaiwa kuanguka nchini humo baada ya ndege zao za kivita kushambuliwa, huku ikiomba msaada wa Kamati ya Kimataifa ya Msalaba Mwekundu (ICRC) kufafanua hatima yao.
Mkuu wa Kamati ya Kutafuta Watu Waliopotea ya Kamandi Kuu ya Majeshi ya Jamhuri ya Kiislamu ya Iran, Brigedia Jenerali Mohammad Bagherzadeh, ameiandikia ICRC akiomba msaada kuhusu hali ya marubani hao.
Kwa mujibu wa Bagherzadeh, ndege mbili za kivita aina ya Su-24 ziliondoka tarehe 2 Machi 2026 kwa ajili ya operesheni ya kijeshi dhidi ya kituo cha kijeshi nchini Qatar.
Amesema wakati ndege hizo zikirejea, marubani walilazimika kuruka kutoka kwenye ndege zao baada ya kushambuliwa na mifumo ya ulinzi wa anga.
Kati ya marubani hao wanne, Majid Kazemi alifariki na kuzikwa mjini Shiraz siku ya Ijumaa, Agosti 29.
Hata hivyo, Iran inadai kuwa marubani wengine watatu walinusurika na walikamatwa wakiwa hai na vikosi vya Qatar.
Marubani wanaodaiwa kushikiliwa wametajwa kuwa Javad Salehi, Abdul Majid Dashtian na Imran Behroshian.
Kabla ya taarifa hiyo, mamlaka na vyombo vya habari nchini Iran vilikuwa vikiripoti kuhusu juhudi za kutafuta taarifa na kubaini hatima ya marubani hao watatu.
Hata hivyo, madai ya Iran kuhusu kukamatwa kwa marubani hao yanahitaji uthibitisho kutoka upande wa Qatar au vyanzo huru.
