Osogbo, Nigeria — Jeshi la Polisi katika Jimbo la Osun limesema mwanamuziki maarufu wa Nigeria, David Adeleke maarufu Davido, alikuwa mlengwa wa shambulio lililolenga msafara wa Gavana wa Osun, Ademola Adeleke, Jumatano, Agosti 19, 2026.
Kwa mujibu wa polisi, tukio hilo lilitokea wakati Gavana Adeleke alipokuwa akitembelea ikulu ya Ataoja wa Osogbo, Oba Jimoh Olanipekun, muda mfupi baada ya kupokea cheti chake cha ushindi kutoka Tume Huru ya Taifa ya Uchaguzi (INEC).
Davido pamoja na watoto wa Gavana Adeleke walikuwa ndani ya msafara wakati watu wasiojulikana walipoanza kufyatua risasi ovyo kuelekea kwenye msafara huo. Walinzi wa gavana walijibu kwa risasi, hali iliyosababisha hofu na taharuki katika eneo hilo.
Msemaji wa Polisi wa Osun, Abiodun Ojelabi, amesema uchunguzi wa awali umebaini kuwa baadhi ya wanachama wa Eye Confraternity walikuwa wakimlenga Davido.
Polisi wamemtaja mtu mmoja, Adebayo Taoreed, maarufu kama Small Rugged, ambaye wanamueleza kuwa mfungwa wa zamani na mtuhumiwa anayedaiwa kuwa mhuni sugu na mwanachama wa kundi hilo.
Kwa mujibu wa Ojelabi, Small Rugged alijaribu kumfikia Davido lakini alizuiwa na walinzi wake. Mzozo huo ulipelekea watu wengine wanaodaiwa kuwa wanachama wa magenge kujiunga na tukio hilo.
“Makabiliano hayo yaliwavuta wanachama wengine wanaoshukiwa kuwa wa magenge katika eneo hilo, ambao kwa muda walizuia lango la ikulu na kuzuia msafara wa Gavana kuendelea na safari,” alisema Ojelabi.
Baada ya muda, watu hao waliondoka eneo la ikulu. Hata hivyo, polisi wanasema wakiwa njiani walimpiga risasi Tajudeen Yusuf, mwenye umri wa miaka 60, katika eneo la Itaolokan, Osogbo.
Polisi walipofika eneo la tukio, walimkuta Yusuf akiwa amelala kwenye dimbwi la damu. Alikimbizwa katika Hospitali ya Kufundishia ya Chuo Kikuu cha Osogbo kwa matibabu, lakini madaktari walithibitisha kuwa amefariki.
Jeshi la Polisi limesema limeanzisha uchunguzi wa kina na linaendelea na operesheni ya kuwabaini na kuwakamata washukiwa waliokimbia baada ya tukio.
