Jeshi la Polisi Kanda Maalum ya Dar es Salaam limesema hali ya usalama jijini humo ni shwari, huku likitangaza kuimarisha ulinzi kuelekea mchezo wa Ligi Kuu Tanzania Bara kati ya Simba na Yanga utakaochezwa Jumamosi, Oktoba 10, 2026, katika Uwanja wa Uhuru, Temeke, Dar es Salaam.
Polisi imesema imechukua hatua za kuimarisha ulinzi na usalama kwa kushirikiana na wadau mbalimbali, ikilenga kuhakikisha mchezo huo unaendeshwa kwa amani na utulivu.
Mchezo huo unatarajiwa kuwavutia maelfu ya mashabiki wa soka kutoka Dar es Salaam na maeneo mengine, huku Simba na Yanga zikiingia uwanjani katika moja ya michezo inayovuta hisia kubwa katika Ligi Kuu Tanzania Bara.
Jeshi la Polisi limewataka mashabiki na wadau wa soka watakaohudhuria mchezo huo kuzingatia sheria, kanuni na taratibu za uendeshaji wa ligi pamoja na masharti yanayosimamia mikusanyiko ya watu.
Aidha, mashabiki wametakiwa kushirikiana na vyombo vya usalama na kuepuka vitendo vinavyoweza kuvuruga amani, usalama na utulivu kabla, wakati na baada ya mchezo.
Polisi limesisitiza kuwa hatua hizo ni sehemu ya maandalizi ya kuhakikisha mchezo huo unafanyika katika mazingira salama kwa wachezaji, mashabiki, viongozi na wadau wote watakaoshiriki.
