KILIMANJARO — Jeshi la Polisi Mkoa wa Kilimanjaro linamsaka Peter Kiariro, mkazi wa Maore wilayani Same, kwa tuhuma za kuhusika na mauaji ya Bernard Kiluwa, mwenye umri wa miaka 26, mkazi wa Kijiji cha Mheza, Kata ya Maore, mkoani Kilimanjaro.
Tukio hilo linadaiwa kutokea Oktoba 12, 2026, majira ya usiku, katika Kitongoji cha Kalemane, Kijiji cha Mheza, Kata ya Maore, Tarafa ya Ndungu, Wilaya ya Same.
Kwa mujibu wa taarifa za awali za uchunguzi, chanzo cha tukio hilo kinadaiwa kuwa ni wivu wa mapenzi, kufuatia marehemu kucheza muziki kwa muda mrefu na mke wa mtuhumiwa wakati wa sherehe ya ubarikio iliyokuwa ikifanyika nyumbani kwa Shabani Rajab.
Inadaiwa kuwa baada ya hali hiyo, mtuhumiwa alimwomba marehemu waende pembeni kwa ajili ya mazungumzo. Hata hivyo, mazungumzo hayo yanadaiwa kuishia katika shambulio ambapo marehemu alijeruhiwa tumboni na kifuani kwa kitu chenye ncha kali kinachodhaniwa kuwa kisu.
Baada ya tukio hilo, mtuhumiwa anadaiwa kutoroka eneo la tukio, huku marehemu akikimbizwa katika Kituo cha Afya Ndungu kwa ajili ya matibabu zaidi kutokana na hali yake kuwa mbaya.
Hata hivyo, Bernard Kiluwa alifariki dunia akiwa anaendelea kupatiwa matibabu katika kituo hicho cha afya.
Jeshi la Polisi Mkoa wa Kilimanjaro linaendelea na juhudi za kumtafuta na kumkamata Peter Kiariro ili aweze kufikishwa katika hatua za kisheria kwa mujibu wa taratibu zilizowekwa.
Jeshi hilo limetoa wito kwa wananchi wenye taarifa zinazoweza kusaidia kupatikana kwa mtuhumiwa kujitokeza na kutoa taarifa katika kituo cha polisi kilicho karibu.
Uchunguzi wa tukio hilo unaendelea, huku tuhuma dhidi ya anayetafutwa zikisubiri hatua za kisheria na uchunguzi zaidi kubaini mazingira kamili ya tukio hilo.
