Kampala, Uganda — Aliyekuwa Sajenti Meja wa Jeshi la Rwanda, Robert Kabera, ambaye alijulikana kwa kumkosoa vikali Rais Paul Kagame, amepatikana ameuawa na mwili wake kukutwa bila kichwa nchini Uganda, katika tukio lililoibua hofu kuhusu usalama wa wakosoaji wa serikali ya Rwanda wanaoishi uhamishoni.
Kabera, mwenye umri wa miaka 50, alikimbilia Uganda baada ya kukabiliwa na tuhuma za unyanyasaji wa kingono, ambazo alizikanusha, huku akidai kuwa alikuwa akifuatiliwa kwa sababu za kisiasa.
Msemaji wa Polisi wa Uganda, Kituuma Rusoke, amesema kichwa cha marehemu bado hakijapatikana. Mwili wake ulipatikana mwishoni mwa wiki na wakazi katika eneo lililoko pembezoni mwa mji mkuu Kampala.
Kwa mujibu wa familia yake, Kabera alikuwa amesafiri kwenda kukagua eneo la ujenzi lililoko umbali wa takribani kilomita 45 kutoka Kampala kabla ya kuuawa.
Mjane wake, Jeanne d’Arc Rwigema Uwizeye, amesema Idhaa ya Maziwa Makuu kupitia ujumbe wa maandishi kuwa kifo cha mumewe kimemwacha katika hali ya hofu kubwa, hasa kuhusu usalama wake na watoto wao.
“Inatisha. Nahisi kama nimechanganyikiwa. Mimi na watoto wangu hatuna usalama,” alisema.
Kabera alikuwa amejipatia umaarufu kupitia muziki na utayarishaji wa maudhui kwenye mtandao wa YouTube, ambako alikuwa na zaidi ya wafuasi 144,000 na video zaidi ya 800, nyingi zikikosoa uongozi wa Rais Kagame na serikali yake.
Hadi sasa, serikali ya Rwanda haijatoa tamko rasmi kuhusu mauaji hayo.
Kundi la upinzani la Rwanda National Congress (RNC), linalofanya shughuli zake uhamishoni, limetaka kufanyika kwa uchunguzi huru, wa kina na wa uwazi ili kubaini waliohusika na mauaji hayo na kuhakikisha wanawajibishwa kwa mujibu wa sheria.
Katika taarifa iliyochapishwa kwenye mtandao wa X, kundi hilo limeeleza kuwa kifo cha Kabera kimeongeza hofu miongoni mwa Wanyarwanda wanaoishi nje ya nchi.
“Leo, familia yake inaomboleza, sauti yake imezimwa, na Wanyarwanda wanaoishi uhamishoni wanakabiliwa na swali la kutisha: tunaweza kuwa salama wapi?” ilisema sehemu ya taarifa hiyo.
Mauaji hayo yanaibua upya wasiwasi kuhusu usalama wa wakosoaji wa serikali ya Rwanda wanaoishi nje ya nchi, hasa kutokana na matukio ya awali yaliyohusisha watu waliowahi kuwa ndani ya mfumo wa uongozi wa nchi hiyo.
Mwaka 2014, Patrick Karegeya, aliyekuwa mkuu wa zamani wa idara ya ujasusi ya Rwanda na mmoja wa waanzilishi wa RNC, alipatikana amefariki katika chumba cha hoteli mjini Johannesburg, Afrika Kusini.
Hata hivyo, katika tukio la Kabera, uchunguzi bado unahitajika kubaini mazingira halisi ya mauaji hayo, wahusika na sababu zilizochangia kifo chake.
Wito wa uchunguzi huru unaendelea kutolewa huku familia yake ikiomboleza na wasiwasi ukiongezeka kuhusu usalama wa wakosoaji wa serikali ya Rwanda wanaoishi uhamishoni katika nchi mbalimbali.
