Rapa maarufu wa Marekani, Cardi B, amejizawadia vitu vya kifahari vyenye thamani ya mamilioni ya dola katika kusherehekea siku yake ya kuzaliwa ya kutimiza miaka 34, ikiwemo saa adimu ya Rolex Daytona, pete maalumu ya almasi zenye karati saba pamoja na mkoba wa kifahari kutoka kampuni ya Hermès.
Kwa mujibu wa taarifa za vyombo vya habari vya burudani vya kimataifa, Cardi B alionyesha zawadi hizo kupitia ukurasa wake wa Instagram, akieleza kuwa aliamua kujinunulia mwenyewe kama njia ya kujipongeza kwa kazi na mafanikio yake.
Zawadi iliyovutia zaidi ni saa ya kifahari ya Rolex Daytona inayofahamika kama Barbie Rolex kutokana na rangi yake ya waridi. Saa hiyo ina mapambo ya yakuti za waridi (pink sapphires), almasi na dhahabu ya njano ya karati 18.
Saa hiyo inakadiriwa kuwa na thamani ya takribani dola milioni 2.85, sawa na zaidi ya shilingi bilioni 7 za Tanzania kwa makadirio ya kiwango cha ubadilishaji cha shilingi 2,500 kwa dola moja. Hata hivyo, thamani halisi inaweza kutofautiana kulingana na soko.
Saa hiyo ilipatikana kwa msaada wa mfanyabiashara wa vito vya thamani Eric Mavani, ambaye alieleza kuwa ni saa adimu sana, huku Cardi B akimshukuru kwa juhudi zake za kuitafuta kutoka maeneo mbalimbali duniani.
Mbali na saa hiyo, rapa huyo pia amejinunulia pete maalumu iliyotengenezwa na kampuni ya Pristine Jewelers, ikiwa na almasi zenye jumla ya karati saba. Pete hiyo ina almasi iliyokatwa kwa umbo la marquise, ikiambatana na almasi nyingine ndogo zinazoongeza mvuto wake.
Zawadi nyingine ni mkoba wa kifahari wa Hermès Mini Kelly wenye rangi ya waridi, ambao ni miongoni mwa bidhaa zinazotamaniwa na wapenzi wa mitindo ya kifahari duniani. Mikoba ya aina hiyo inaweza kufikia bei kubwa katika soko la bidhaa za kifahari, kutegemea aina ya ngozi na upatikanaji wake.
Kupitia ujumbe wake wa Instagram, Cardi B alieleza kuwa zawadi hizo ni njia yake ya kujipongeza mwenyewe, akionyesha namna anavyotumia mafanikio yake kujinunulia bidhaa za thamani kubwa.
Hatua hiyo imeendelea kuvuta hisia za mashabiki na wapenzi wa mitindo ya kifahari, huku ikionyesha namna msanii huyo anavyopenda kujizawadia bidhaa adimu na za gharama kubwa katika kusherehekea mafanikio yake.
