MKURANGA – Mahakama imemhukumu Maulid Khalfan Milongia (25), mkazi wa Chang’ombe Vianzi, Wilaya ya Mkuranga, Mkoa wa Kipolisi Rufiji, kifungo cha maisha jela baada ya kupatikana na hatia ya kumbaka mtoto mwenye umri wa miaka mitatu.
Hukumu hiyo imetolewa Novemba 2, 2026, baada ya mahakama kusikiliza na kujiridhisha na ushahidi uliowasilishwa na upande wa mashtaka katika shauri hilo.
Kwa mujibu wa taarifa ya tukio hilo, mshtakiwa alitenda kosa hilo Juni 21, 2026, katika Wilaya ya Mkuranga.
Katika kuendesha kesi hiyo, upande wa mashtaka uliwasilisha jumla ya mashahidi sita mbele ya mahakama ili kutoa ushahidi kuhusu tuhuma zilizokuwa zikimkabili mshtakiwa.
Baada ya kusikiliza ushahidi wa mashahidi hao na kupitia mwenendo mzima wa shauri, mahakama ilijiridhisha kuwa upande wa mashtaka umethibitisha kosa hilo pasipo kuacha shaka.
Kutokana na uamuzi huo, Mahakama, mbele ya Hakimu Mkazi Mfawidhi, Sameera Suleiman, imemhukumu Milongia kifungo cha maisha gerezani.
Mbali na adhabu hiyo, mshtakiwa ameamriwa kulipa fidia ya Shilingi milioni moja (Tsh 1,000,000).
Hukumu hiyo inalenga kutoa ujumbe kwa jamii kuhusu uzito wa makosa ya ukatili wa kingono dhidi ya watoto na umuhimu wa kulinda haki na usalama wa watoto.
Tukio hilo linaendelea kukumbusha umuhimu wa jamii kushirikiana katika kuwalinda watoto dhidi ya vitendo vya ukatili, pamoja na kutoa taarifa kwa mamlaka husika pale wanapobaini vitendo vinavyohatarisha usalama wao.
