Wakili wa taasisi ya Zimbabwe Human Rights NGO Forum (ZHRNGO Forum) wamesema Jeshi la Polisi la Zimbabwe (ZRP) halikupokea zawadi yoyote kati ya zile za thamani kubwa ambazo mfanyabiashara marehemu Wicknell Chivayo alikuwa ameahidi kuwapatia maafisa wake.
Chivayo, aliyefariki Septemba 30 katika ajali ya helikopta, alikuwa ameahidi kulipatia jeshi hilo magari 10 aina ya Toyota Fortuner yasiyopenya risasi, vifaa vya kiusalama vyenye thamani ya dola za Marekani 250,000 pamoja na simu aina ya iPhone 17 Pro Max kwa kila askari wa Kitengo cha Upelelezi wa Makosa ya Mauaji (CID Homicide Division) jijini Harare.
Ahadi hizo zilitolewa kufuatia kukamatwa, kushtakiwa na kufungwa jela kwa watu waliovamia shamba la wakwe zake katika eneo la Alpha and Omega, Marondera, Machi mwaka jana.
Watu hao 18 walikuwa wameiba mali na fedha zenye thamani ya zaidi ya dola za Marekani 100,000, wiki chache tu baada ya Chivayo kulipa mahari kwa ajili ya kumuoa mke wake marehemu, Lucy Muteke.
Mawakili Obey Shava na Obey Chitowamombe walikuwa wamepewa jukumu na wateja ambao hawakutajwa majina kufungua kesi dhidi ya Kamishna Mkuu wa Polisi na Waziri wa Mambo ya Ndani kuhusu ahadi ya Chivayo ya kutoa zawadi hizo.
Hata hivyo, haikufahamika wazi aina ya madai yaliyokuwa katika kesi hiyo wala malengo yake.
Akizungumza kuhusu suala hilo, wakili Obey Shava alisema wamehakikishiwa na polisi kuwa hakuna askari aliyepokea hata zawadi ndogo kutoka kwa Chivayo.
Alisema kwa sasa hawana sababu ya kutilia shaka maelezo waliyopewa na jeshi hilo, hivyo kuwashauri wananchi kuwa suala hilo limefungwa.
Chivayo na mke wake walifariki katika ajali ya helikopta wakati wakisafiri kutoka Marondera.
Mfanyabiashara huyo alijulikana kwa maisha ya kifahari na kutoa zawadi na michango ya fedha nyingi kwa watu binafsi na makundi mbalimbali aliyokuwa na uhusiano nayo, yakiwemo yaliyokuwa karibu na chama tawala cha Zanu PF kinachoongozwa na Rais Emmerson Mnangagwa.
