×

Yanga Atoa Onyo kwa Polisi Tanzania Kuelekea Mpambano wa Moshi

Yanga leo Novemba 19, 2026  imeeleza kuwa ipo tayari kwa mchezo wake dhidi ya Polisi Tanzania utakaopigwa kesho, Novemba 20, 2026, katika Uwanja wa Ushirika, mjini Moshi, kuanzia saa 10:00 jioni.

Akizungumza kuelekea mchezo huo, Kocha wa mipira ya kutengwa wa Yanga, Kagisho Dikgacoi, amesema kikosi hicho kimefanya maandalizi mazuri kupitia kambi ya Zanzibar, huku akieleza kuridhishwa na mwitikio wa wachezaji katika kuanza kuzoea mbinu mpya za kiufundi chini ya kocha mpya.

Dikgacoi amesema wachezaji wameonesha utayari wa kujifunza na kuendana na mfumo mpya wa timu, huku waliokuwa kwenye majukumu ya timu zao za taifa wakijiunga na kikosi tangu jana ili kuendelea na maandalizi ya mchezo huo.

Akizungumzia upinzani wa Polisi Tanzania, Dikgacoi amesema wanatarajia mchezo mgumu kutokana na ubora wa wapinzani wao, ambao wanatoka kupata ushindi dhidi ya Kagera, jambo linaloweza kuwaongezea morali ya kupambana.

Hata hivyo, amesema Yanga inaingia kwenye mchezo huo ikiwa na dhamira ya kupata alama zote tatu ili kupunguza tofauti ya pointi dhidi ya wapinzani wao katika mbio za ushindani wa ligi.

Ameongeza kuwa kikosi hicho hakijishughulishi na matokeo ya wapinzani wao, bali kimejikita katika kuboresha kiwango chake na kuhakikisha kinashinda michezo yote iliyosalia.

Kwa upande wake, mchezaji wa Yanga, Hussein Masalanga, amesema kikosi kimejiandaa vizuri na kina matumaini ya kuendeleza matokeo mazuri baada ya kufanya vizuri katika mchezo uliopita.

Masalanga amesema timu imejiandaa kukabiliana na changamoto mbalimbali zitakazojitokeza uwanjani, ikiwemo hali ya uwanja, akieleza kuwa tayari wamewahi kucheza katika viwanja vya aina hiyo.

Aidha, amewashukuru mashabiki wa Yanga maarufu kama Wananchi kwa kuendelea kuipa timu sapoti kubwa kila inapokwenda, huku akiwaahidi burudani ya soka na juhudi za kuhakikisha wanapata ushindi.

Yanga sasa inaingia kwenye mchezo huo ikiwa na lengo la kuondoka na alama zote tatu dhidi ya Polisi Tanzania katika kile kinachoahidi kuwa pambano lenye ushindani mkubwa mjini Moshi.

Leave a Comment