Waziri wa Mambo ya Nje wa Marekani, Marco Rubio, ametoa onyo kali kuhusu nafasi ya Iran katika usalama wa nishati duniani, akieleza kuwa kufungwa kwa Mlango-Bahari wa Hormuz kunaweza kuwa na athari kubwa sawa na “silaha ya nyuklia ya kiuchumi”.
Katika mahojiano na Fox News, Rubio alisema kuwa Iran ina uwezo wa kuathiri sehemu kubwa ya usambazaji wa nishati duniani kupitia njia hiyo muhimu ya bahari.
Alisisitiza kuwa takriban asilimia 20 hadi 25 ya mafuta yanayosafirishwa duniani hupitia katika Mlango-Bahari wa Hormuz, hali inayofanya eneo hilo kuwa na umuhimu mkubwa kimkakati.
Kwa mujibu wa Rubio, kauli na vitendo vya Iran vinaashiria nia ya kuitumia nafasi hiyo kama chombo cha shinikizo dhidi ya mataifa mengine.
“Iran inajigamba kwamba inaweza kushikilia mateka sehemu kubwa ya nishati ya dunia,” alisema, akionya kuwa hatua kama hiyo inaweza kuvuruga uchumi wa kimataifa kwa kiwango kikubwa.
Aidha, Rubio alieleza wasiwasi wake kuhusu uwezekano wa Iran kumiliki silaha za nyuklia, akisema hatua hiyo ingeipa uwezo mkubwa zaidi wa kuathiri si tu Mashariki ya Kati bali pia usalama wa dunia kwa jumla.
Kwa mtazamo wake, Iran tayari inatumia rasilimali zake za mafuta kama njia ya kujipatia nguvu ya kisiasa na kiuchumi, na kumiliki silaha za nyuklia kungeongeza hatari hiyo.Waziri wa Mambo ya Nje wa Marekani, Marco Rubio
