Maambukizi yanayoshukiwa kuwa ya ugonjwa wa Ebola mashariki mwa Jamhuri ya Kidemokrasia ya Kongo yameongezeka na kufikia zaidi ya kesi 900 kufikia Jumapili ya Mei 24, 2026 huku hali ya usalama na ukosefu wa huduma za afya vikizidisha hofu ya kusambaa kwa ugonjwa huo.
Kwa mujibu wa mamlaka za Congo, watu 119 wanashukiwa kufariki kutokana na mlipuko huo ambao umeathiri zaidi jimbo la Ituri. Kesi nyingine pia zimeripotiwa katika majimbo ya North Kivu na South Kivu pamoja na nchi jirani ya Uganda.
Mashirika ya afya yamesema hali ya mashariki mwa Congo imekuwa mbaya kutokana na mashambulizi ya makundi ya waasi, uhaba wa huduma za msingi na maelfu ya watu waliokimbia makazi yao.
Waasi wa AFC/M23 wanaoungwa mkono na Rwanda wanadhibiti baadhi ya maeneo yaliyoathirika, huku kundi la waasi la Allied Democratic Forces (ADF) linalohusishwa na kundi la Islamic State likihusishwa na mashambulizi dhidi ya raia.
Mashirika ya misaada yameonya kuwa kupunguzwa kwa misaada ya kimataifa, hasa kutoka Marekani na nchi nyingine tajiri, kumeathiri vibaya uwezo wa kukabiliana na mlipuko huo.
Wahudumu wa afya wanasema wanakabiliwa na uhaba mkubwa wa vifaa muhimu kama mavazi maalumu ya kujikinga, vifaa vya kupima Ebola na vifaa vya mazishi salama.
Aidha, kuchomwa kwa vituo vya matibabu katika maeneo ya Rwampara na Mongbwalu kumeonyesha hasira ya baadhi ya wananchi dhidi ya mashirika ya misaada na hatua kali zinazochukuliwa kudhibiti maambukizi.
Mamlaka za Congo sasa zimepiga marufuku mikusanyiko ya mazishi na makundi ya watu zaidi ya 50 katika maeneo yaliyoathirika, huku askari wakilinda baadhi ya shughuli za mazishi ili kuzuia kusambaa zaidi kwa ugonjwa huo.
Aina ya Ebola ya Bundibugyo inayosababisha mlipuko huo bado haina chanjo wala tiba rasmi iliyothibitishwa.
