Mvutano kati ya Iran na United States unaweza kuingia katika hatua mpya ya utulivu baada ya mataifa hayo mawili kuripotiwa kufikia makubaliano ya kuongeza muda wa usitishaji mapigano pamoja na kuondoa vikwazo vya usafirishaji kupitia Mlango wa Hormuz.
Kwa mujibu wa taarifa zilizoripotiwa na Reuters, makubaliano hayo yanatarajiwa kuongeza usitishaji mapigano kwa siku 60 zaidi huku yakiruhusu shughuli za usafirishaji kuendelea katika njia hiyo muhimu ya baharini wakati mazungumzo zaidi yakifanyika kuhusu masuala nyeti, ikiwemo mpango wa nyuklia wa Iran.
Hata hivyo, vyanzo hivyo vimeeleza kuwa Rais wa Marekani Donald Trump bado hajatoa idhini rasmi ya makubaliano hayo. Upande wa Iran pia bado haujathibitisha rasmi taarifa hizo.
Vyombo vya habari vya serikali ya Iran vimeripoti kuwa maandishi ya mwisho ya makubaliano hayo bado hayajakamilishwa wala kuthibitishwa. Shirika la habari la Tasnim limemnukuu mmoja wa watu walio karibu na timu ya mazungumzo akisema bado kuna mambo kadhaa yanahitaji kujadiliwa kabla ya kufikia hitimisho rasmi.
Iwapo makubaliano hayo yataidhinishwa na Washington pamoja na Tehran, yatakuwa hatua kubwa zaidi kuelekea kurejesha utulivu tangu kuanza kwa mzozo huo Februari 28 mwaka huu.
Taarifa hizi zimeibuka baada ya siku za mashambulizi ya kulipizana kati ya mataifa hayo mawili licha ya kuwepo kwa usitishaji mapigano ulioanza mapema mwezi Aprili.
Mlango wa Hormuz umeendelea kuwa eneo muhimu kwa biashara ya mafuta duniani, hivyo hatua yoyote ya kupunguza mvutano katika eneo hilo huangaliwa kwa karibu na mataifa mengi pamoja na masoko ya kimataifa.
