Nyota wa timu ya Taifa ya Brazil, Vinicius Junior, anatarajiwa kuwa mtu wa kuangaliwa zaidi wakati Brazil itakapofungua kampeni yake ya Kombe la Dunia 2026 dhidi ya Morocco usiku wa kuamkia kesho.
Mshambuliaji huyo wa Real Madrid amesema mashindano haya ni muhimu zaidi katika maisha na taaluma yake, hasa baada ya nyota mkongwe Neymar kuondolewa kwenye mchezo wa ufunguzi kutokana na majeraha ya misuli ya mguu.
Kutokana na hali hiyo, Vinicius sasa ndiye uso mpya wa Brazil chini ya kocha Carlo Ancelotti, ambaye aliteuliwa kurejesha heshima ya timu hiyo baada ya miaka ya matokeo yasiyoridhisha katika mashindano makubwa.
Vinicius na Ancelotti wana historia nzuri pamoja baada ya kushinda mataji mawili ya UEFA na mawili ya La Liga wakiwa Real Madrid, jambo linalompa nyota huyo kujiamini zaidi akiwa na timu ya taifa.
Hata hivyo, Brazil haitakuwa na kazi rahisi dhidi ya Morocco, ambao waliandika historia mwaka 2022 kwa kuwa timu ya kwanza kutoka Afrika kufika nusu fainali ya Kombe la Dunia.
Licha ya Morocco kuingia kwenye mchezo huo ikiwa imepoteza baadhi ya wachezaji muhimu kutokana na majeraha, kocha wao Mohamed Ouahbi amesema hawatabadilisha mfumo wao wa mchezo.
Mchezo huo wa Kundi C unasubiriwa kwa hamu kubwa huku mashabiki wakitaka kuona kama Vinicius ataweza kuiongoza Brazil kuanza kwa ushindi katika harakati za kutafuta taji lao la sita la Kombe la Dunia.
