Dili la kiungo wa Atalanta, José Éderson, kujiunga na Manchester United limevunjika rasmi baada ya mchezaji huyo kushindwa kupita vipimo vya pili vya afya, hali iliyowalazimu Mashetani Wekundu kusitisha usajili uliokuwa ukitajwa kuwa na thamani ya euro milioni 45.
Kwa mujibu wa taarifa, Éderson alifanyiwa vipimo vya awali vya afya nchini Marekani wakati akiwa na timu yake kwenye michuano ya Kombe la Dunia 2026. Vipimo hivyo vilibaini wasiwasi kuhusu hali ya goti lake, hasa eneo la meniscus, jambo lililowafanya madaktari wa Manchester United kuhitaji uchunguzi wa kina zaidi.
Julai 10, 2026, kiungo huyo alifanyiwa vipimo vya ziada nchini England kabla ya kukamilisha uhamisho wake, lakini matokeo yalionyesha bado kuna hatari inayohusiana na jeraha hilo, hivyo United ikaamua kujiondoa kwenye dili hilo ili kuepuka kusajili mchezaji mwenye historia ya majeraha.
Licha ya uamuzi huo, Atalanta inaendelea kusisitiza kuwa Éderson yuko katika hali nzuri kiafya na ana uwezo wa kucheza kwa asilimia 100. Klabu hiyo inapanga kumrejesha kwenye maandalizi ya msimu mpya.
Baada ya kusitisha dili hilo, Manchester United sasa inatajwa kuelekeza nguvu zake kwa kiungo wa AS Roma na timu ya taifa ya Ufaransa, Manu Koné, ambaye ameibuka kuwa mmoja wa wachezaji wanaofuatiliwa kwa karibu ili kuimarisha safu ya kiungo kuelekea msimu ujao.
