Ripoti kutoka kwa vyombo vya habari na vyanzo vya kijeshi zimedai kuwa Saudi Arabia ilisimamia mafunzo ya wapiganaji wa Somalia katika eneo la Guri Jebel, mkoani Galguduud ndani ya Jimbo la Galmudug, kwa msaada wa wakandarasi wa kijeshi wa kigeni waliotoka Romania, Ukraine, Afrika Kusini na Colombia.
Kwa mujibu wa taarifa hizo, jumla ya waajiriwa wapya wa Somalia 5,107 wanashiriki katika programu hiyo ya mafunzo ya miezi tisa inayodaiwa kufadhiliwa moja kwa moja na Saudi Arabia, kufuatia ziara ya ujumbe wa kijeshi wa Saudi uliofanyika mwishoni mwa mwezi Juni mwaka huu.
Ripoti hizo zinaeleza kuwa miongoni mwa washiriki hao, takribani watu 2,000 walitoka katika eneo la Kaskazini Mashariki mwa Somalia.
Wachambuzi wa masuala ya usalama sasa wanatazama uwezekano wa baadhi ya wakandarasi hao wa kijeshi kuhamishiwa Sudan, ambako Saudi Arabia inadaiwa kufadhili na kuzipatia silaha baadhi ya vikundi vya wanamgambo wenye msimamo mkali.
Wakati huo huo, jarida la kijasusi la Intelligence Online limedai kuwa Saudi Arabia iliipatia Jeshi la Sudan aina mbalimbali za silaha, zikiwemo mifumo ya kisasa ya makombora na kiasi kikubwa cha risasi katika kipindi cha mwaka 2023 hadi 2024.
Ripoti hiyo pia ilidai kuwa wakandarasi wa kijeshi kutoka Ukraine walihusika katika kutoa mafunzo kwa vikosi vya mizinga vya Sudan pamoja na washirika wao, madai ambayo yalisemekana kuungwa mkono na picha na video za mwaka 2023 zinazoonyesha uwepo wao nchini humo.
Maendeleo hayo yameibua wasiwasi kuhusu kuongezeka kwa shughuli za makundi yenye misimamo mikali barani Afrika, huku baadhi ya wachambuzi wakihofia kuwa mafunzo hayo yanaweza kutumiwa katika operesheni za kijeshi nchini Somalia, Sudan na maeneo mengine ya bara hilo.
Hakujakuwa na uthibitisho huru wa madai hayo kutoka kwa mamlaka za Saudi Arabia, Somalia au Sudan kufikia wakati wa kuchapishwa kwa taarifa hii.
