DAR ES SALAAM: Kesi ya uhaini inayomkabili Mwenyekiti wa Chama cha Demokrasia na Maendeleo (CHADEMA), Tundu Lissu, inatarajiwa kuendelea leo katika Mahakama Kuu ya Tanzania, Masjala Ndogo ya Dar es Salaam, baada ya kusimama kwa muda wa siku 167.
Kesi hiyo ilisimama tangu Februari 24, 2026, baada ya Jamhuri kupitia Mkurugenzi wa Mashtaka nchini (DPP) kuwasilisha notisi ya rufaa kuhusu mwenendo na maamuzi yaliyotolewa na Mahakama.
Hatua hiyo ilifuatia uamuzi wa Mahakama kukubaliana na mapingamizi yaliyowasilishwa na Lissu kuhusu kutokukubaliwa kwa ushahidi wa ziada wa ACP Amini Mahamba, aliyekuwa kiongozi wa timu iliyochunguza matukio yaliyotokea wakati wa Uchaguzi Mkuu wa 2025.
Lissu anashikiliwa gerezani tangu alipokamatwa Aprili 9, 2025, na siku iliyofuata, Aprili 10, 2025, alifikishwa mahakamani na kushtakiwa kwa kosa la uhaini pamoja na uchochezi.
Kesi hiyo imekuwa ikifuatiliwa kwa karibu nchini kutokana na uzito wa mashtaka yanayomkabili kiongozi huyo wa CHADEMA na mvutano wa kisheria kuhusu ushahidi unaotakiwa kutumika katika kesi hiyo.
Kuendelea kwa mwenendo wa kesi leo kunatarajiwa kutoa mwelekeo kuhusu hatua zinazofuata katika shauri hilo.
