Bunge la Armenia limekumbwa na vurugu baada ya wabunge wa chama tawala na upinzani kupigana wakati wa kikao cha Alhamisi, Oktoba 29, 2026, kufuatia mabishano yaliyoibuka kuhusu familia ya kiongozi wa kundi la upinzani la Strong Armenia, Narek Karapetyan.
Mzozo huo ulianza baada ya mbunge wa chama tawala, Taron Chakhoyan, kutoa kauli iliyozua hasira miongoni mwa wabunge wa upinzani, hali iliyosababisha majibizano makali kugeuka kuwa mapigano ndani ya ukumbi wa bunge.
Kwa mujibu wa taarifa za vyombo vya habari vya ndani, kauli ya Chakhoyan ilihusisha ndugu wa Karapetyan na mapendekezo ya kisiasa ya upinzani.
Karapetyan alijibu kwa hasira, huku wabunge wengine wakijiunga katika mabishano hayo. Hali ilizidi kuwa mbaya baada ya wabunge kuanza kusukumana na kurushiana makonde, na kusababisha shughuli za bunge kuvurugika.
Katika mapigano hayo, mbunge wa upinzani Andranik Gevorgyan aliripotiwa kuumia puani na kutokwa damu, huku nguo za mbunge mwingine, Ruben Mkhitaryan, zikichanika.
Aidha, Naibu Spika wa Bunge, Vahagn Aleksanyan, aliripotiwa kurusha kiti kuelekea kwa wabunge wa upinzani. Vurugu hizo hazikuishia ndani ya ukumbi wa bunge pekee, bali ziliendelea hadi kwenye korido za jengo hilo.
Kutokana na hali hiyo, Spika wa Bunge, Ruben Rubinyan, alisitisha kikao na kuagiza maafisa wa usalama kuingilia kati kurejesha utulivu.
Ripoti za awali zilieleza kuwa gari la wagonjwa lilitumwa bungeni, ingawa mkuu wa muda wa huduma ya ambulansi alisema huduma hiyo ilisimamishwa ikiwa njiani. Hata hivyo, taarifa zilizotolewa hazikuweka wazi kikamilifu idadi ya waliojeruhiwa wala hali zao baada ya tukio hilo.
Tukio hilo limeripotiwa kuwa la tatu la mapigano ndani ya Bunge la Armenia katika mwezi Oktoba, likionyesha kuongezeka kwa mvutano kati ya chama tawala na upinzani.
Vurugu hizo zimeibua maswali kuhusu nidhamu ya wabunge, usalama ndani ya bunge na mwenendo wa mijadala ya kisiasa nchini humo. Hadi sasa, taarifa zilizowasilishwa hazijaweka wazi hatua zitakazochukuliwa dhidi ya wabunge waliohusika.
