WATU 6 wamekufa na wengine 38 kujeruhiwa vibaya baada ya basi lenye namba za usajili T 798 AKV mali ya Lupondije Express linalofanya safari za Mwanza kwenda Iringa kupinduka eneo la Mteremko wa Ipogolo mjini Iringa.
Mashuhuda wanasema kuwa basi hilo lililotakiwa kumalizia safari yake mjini Iringa lilipitiliza kwenda Ipogolo kwa minajiri ya kufaulisha abiria wachache wa Mbeya. Imeelezwa kuwa baadhi ya abiria waliokufa katika ajali hiyo na majeruhi ni wale ambao walitakiwa kumaliza safari yao mkoani Iringa lakini dereva wa basi hilo aligoma kuwashusha na kupitiliza kwenda Ipogolo kufaulisha abiria wa Mbeya kwanza ndipo arudi kuwashusha wa Iringa.
Ajali hiyo imetokea majira ya saa 2 usiku jana baada ya basi hilo kufeli breki katika mteremko huo huo mkali kabla ya kupinduka katika eneo linalojulikana kama Kisima cha Bibi.
Wema Zuberi ni mmoja kati ya majeruhi wa ajali hiyo aliyekuwa ametoka mkoani Dodoma kuelekea Mbeya alieleza kuwa mwendo wa basi hilo haukuwa mkali bali kawaida.
Majeruhi huyo alieleza kuwa baada ya kuingia katikati ya mji wa Iringa ndipo dereva wa basi hilo alionesha kuendesha basi hilo kwa mwendo mkali zaidi kiasi cha baadhi ya abiria kulalamika mwendo huo na kutaka kushushwa ila dereva hakuwasikiliza zaidi ya abiria hao.
“Abiria wengi walionyesha kumlalamikia dereva huyo kwanza kutokana na kuwapitiliza stendi pasipo kuwashusha na pili mwendo kasi ambao alikuwa akienda nao ili kufanikisha kutufaulisha abiria tuliokuwa tukielekea Mbeya” alieleza
Zaidi alisema, kabla ya kufika eneo hilo ambalo basi lilipinduka kuna kona kali na mteremko mkali na kilichoonekana haraka haraka ni dereva kushindwa kukata kona hiyo baada ya Breki kufeli na hivyo kulazimika kuhama njia na kugonga kingo za barabara hiyo na kupinduka .
Mkuu wa wilaya ya Iringa Bw Richard Kasesela akizungumza na mwandishi wa habari hizi eneo la tukio alisema kuwa zoezi la kuendelea kutafuta miili iliyobanwa na basi hilo imekuwa ngumu kutokana na kukosekana kwa gari la kuinua basi hilo na tayari amemwagiza meneja wa Tanesco kuleta gari hilo na iwapo dereva hayupo basi
Hata hivyo alisema kuwa kuanzia sasa dawa ya madereva hao ni kuwashughulikia kwani kama Rai imekwisha tolewa mara nyingi na bado ajali zinaendelea kutokea.
Kamanda wa Polisi mkoa wa Iringa aliahidi kutoa taarifa mara tu zoezi hilo litakapokamilika kwa kuinua basi hilo na kutazama kwa kina kama kuna miili ambayo imefunikwa chini ama la.
Mwandishi wa habari hizi alishuhudia miili minne ikiwa tayari imetolewa katika basi hilo huku majeruhi wengi wakiwa wamepata majeraha makubwa mikononi ,miguuni na kichwani,Majeruhi wa ajali hiyo wamelazwa Hospitali ya Rufaa ya mkoa wa Iringa.
