Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameongoza Mkutano wa Tatu wa Nchi Zinazozalisha Kahawa Barani Afrika (The 3rd G25 Africa Coffee Summit) uliofanyika katika Kituo cha Mikutano cha Kimataifa cha Julius Nyerere (JNICC) jijini Dar es Salaam leo, Februari 22, 2025.
Katika tukio hilo, Rais Samia aliwashangaza na kuwafurahisha wajumbe wa mkutano huo kwa kunywa kahawa jukwaani wakati wa hotuba yake. Hatua hiyo ilikuwa ishara ya kuhamasisha umuhimu wa zao la kahawa, ambalo ni moja ya mazao ya kimkakati kwa uchumi wa Tanzania na Afrika kwa ujumla.
Rais Samia alisisitiza kuwa Tanzania ina nafasi kubwa katika soko la kahawa duniani na akatoa wito kwa mataifa ya Afrika kuongeza thamani ya mazao yao ili kupata faida zaidi badala ya kuuza malighafi. Aidha, alieleza kuwa serikali inaendelea kuweka mikakati madhubuti ya kusaidia wakulima wa kahawa ili kuongeza uzalishaji na ubora wa zao hilo.
Wakati wa mkutano huo, Rais Samia alipata fursa ya kusikiliza maelezo kutoka kwa Waziri wa Kilimo, Hussein Bashe, kuhusu hatua zinazochukuliwa kuinua sekta ya kahawa nchini. Mkutano huo ulihudhuriwa na viongozi mbalimbali wa Afrika, wawakilishi wa sekta ya kilimo, na wadau wa biashara ya kahawa kutoka mataifa mbalimbali.
Kwa mara nyingine, Tanzania imethibitisha nafasi yake kama mzalishaji muhimu wa kahawa barani Afrika, huku Rais Samia akihamasisha matumizi ya kahawa kama sehemu ya utambulisho wa taifa na fursa ya kiuchumi kwa wananchi wake.
