Rais wa Urusi, Vladimir Putin, amealikwa kujiunga na Bodi ya Amani iliyoanzishwa na Rais wa Marekani, Donald Trump, kamati itakayokuwa na jukumu la kusimamia mchakato wa kuijenga upya Ukanda wa Gaza.

Kwa mujibu wa taarifa iliyotolewa na msemaji wa Rais wa Urusi, mwaliko huo umefika rasmi, huku mamlaka za Urusi zikieleza kuwa kwa sasa zinafanyia kazi mwaliko huo na kusubiri maelezo ya kina zaidi kutoka Serikali ya Marekani kuhusu majukumu, muundo na upeo wa bodi hiyo.

Msemaji huyo amesema Urusi inaendelea kufuatilia kwa karibu mpango huo, ikizingatia umuhimu wa mchango wa jumuiya ya kimataifa katika kuleta amani ya kudumu na kusaidia juhudi za ujenzi upya wa Gaza baada ya madhara makubwa yaliyotokana na mzozo unaoendelea katika eneo hilo.

Hatua ya kumualika Rais Putin inaashiria jitihada za kuhusisha mataifa yenye ushawishi mkubwa duniani katika mchakato wa amani na ujenzi upya, huku macho ya dunia yakiendelea kuelekezwa kwenye mustakabali wa Gaza na Mashariki ya Kati kwa ujumla.

Urusi haijatangaza rasmi kama itakubali au itakataa mwaliko huo, ikieleza kuwa uamuzi wake utategemea maelezo ya ziada yatakayotolewa na upande wa Marekani.

TRUMP AVUJISHA UJUMBE wa SIRI wa RAIS wa UFARANSA AKIBEMBELEZA SUALA la GREENLAND…