Dodoma. Kampuni ya mawasiliano ya Airtel Tanzania imetangaza kuendelea kuwekeza katika miundombinu ya mawasiliano na huduma za kifedha kidijitali, ikiunga mkono ajenda ya mabadiliko ya kidijitali nchini.
Hayo yalibainishwa wakati wa kikao kazi kati ya Wizara ya mawasiliano na teknolojia ya habari na wadau wa sekta binafsi kilichofanyika katika Ofisi za Wizara hiyo, Mji wa Serikali Mtumba, jijini Dodoma, Februari 26, 2026, kujadili masuala mbalimbali yanayohusu maendeleo ya sekta ya mawasiliano na teknolojia ya habari nchini, pamoja na kuimarisha ushirikiano kati ya Serikali na sekta binafsi katika kukuza uchumi wa kidijitali.
Akizungumza katika kikao hicho, Mkurugenzi Mtendaji wa Airtel Tanzania, Charles Kamoto, alisema kati ya mwaka 2021 na 2025 kampuni imewekeza dola za Marekani milioni 316 (takribani Shilingi trilioni 0.8) katika upanuzi na uboreshaji wa mtandao wake nchini.
Alisema kwa sasa Airtel ina jumla ya tovuti 3,385 za mawasiliano nchini kote, karibu zote zikiwa na teknolojia ya 4G huku tovuti 139 zikiwa zimewezeshwa huduma ya 5G.
Pia, kampuni imejenga zaidi ya kilomita 3,722 za mkongo wa mawasiliano (fibre optic) ili kuimarisha ubora na kasi ya huduma.
Kamoto alisema Airtel inaendelea kujenga kituo cha kisasa cha kuhifadhi data mkoani Arusha ili kuongeza uthabiti wa huduma katika Kanda ya Kaskazini, pamoja na kushiriki katika mradi wa kebo ya kimataifa ya chini ya bahari ya 2Africa unaounganisha Tanzania na masoko ya kimataifa.
Kwa mujibu wa takwimu zilizowasilishwa, Airtel kwa sasa inahudumia wateja zaidi ya milioni 20.4 na ilirekodi mapato ya dola milioni 430 kwa mwaka wa fedha 2025, ikiwa na kiwango cha faida (EBITDA) cha asilimia 47.5.
Kupitia huduma ya Airtel Money, zaidi ya watumiaji milioni 8.4 wanapata huduma za malipo, mikopo, akiba na bima kwa njia ya simu.
Katika kipindi cha miaka mitano iliyopita, kampuni imelipa dola milioni 643 kama kodi na ada za udhibiti, pamoja na kugawa gawio la dola milioni 110 kwa Serikali.
Kampuni pia ilitambuliwa na Tanzania Revenue Authority kama mlipakodi bora kitaifa kwa mwaka wa fedha 2023/24.
Katika kikao hicho, Airtel ilipendekeza kupunguzwa kwa ushuru wa bidhaa kwenye huduma za mawasiliano kutoka asilimia 17 hadi 10, kurejeshwa kwa msamaha wa VAT kwenye simu janja ili kuongeza upatikanaji wake, pamoja na kuharakishwa kwa vibali vya Tathmini ya Athari kwa Mazingira (EIA) ili kusaidia upanuzi wa mtandao vijijini.
Akizungumza katika kikao hicho, Waziri Kairuki amesema Wizara inaendelea kutekeleza Programu ya Kitaifa ya Anga za Juu, ikiwa ni utekelezaji wa maono ya Mheshimiwa Rais wa Jamhuri ya Muungano wa Tanzania aliyoyatoa Februari 8, 2022, kuhusu Serikali kumiliki satelaiti yake kwa ajili ya kutatua changamoto za mawasiliano nchini.
“Ni matarajio yetu kuwa kupitia ushirikiano wa Serikali na Sekta Binafsi, programu hii itachangia kukuza uchumi wa kidijitali na maendeleo ya Taifa kwa ujumla,” amesema Waziri Kairuki.
Aidha, Waziri Kairuki amebainisha kuwa Wizara inaendelea kuimarisha ulinzi wa Miundombinu Muhimu ya TEHAMA (CII) kwa kuzingatia Sheria ya Makosa ya Mtandao ya mwaka 2015, ambapo mwongozo wa kutangaza miundombinu hiyo uko katika hatua za mwisho za uridhiwaji.
Ametoa wito kwa wadau wa sekta kushirikiana na Wizara kulinda na kuendeleza miundombinu hiyo kwa manufaa ya Taifa, akisisitiza kuwa ni jukumu la pamoja kuhakikisha usalama na uimara wake.
Waziri Kairuki amesisitiza umuhimu wa ushirikiano kati ya Serikali na Sekta Binafsi katika utekelezaji wa Mkakati wa Taifa wa Uchumi wa Kidijitali, akisema ushirikiano huo ni chachu ya ubunifu, uwekezaji na ajira.
Pia ameeleza kuwa Wizara inashirikiana na wadau kuandaa Akaunti ya Upimaji wa Uchumi wa Kidijitali (DESA) ili kubaini mchango wa sekta ya TEHAMA katika pato la Taifa.
