WANAANGA wa misheni ya Artemis II wamezungumza moja kwa moja wakiwa ndani ya chombo cha anga aina ya Orion, wakielezea safari yao hadi sasa na matarajio ya hatua zinazofuata katika safari hiyo ya kihistoria.
Misheni hiyo ilizinduliwa siku ya Jumatano, ikiwa imebeba wanaanga wanne ambao wanasafiri katika safari ya takribani siku 10 kuzunguka mwezi kabla ya kurejea duniani.
Akizungumza kutoka angani, Kamanda wa misheni hiyo, Reid Wiseman, alisema walipata mtazamo wa kipekee wa Dunia kutoka angani.
Alisema waliweza kuona dunia nzima kutoka ncha hadi ncha, pamoja na mabara kama Afrika na Ulaya, na hata mwanga wa aurora (northern lights) ulioonekana kwa mbali.
“Ni moja ya mambo ya kuvutia zaidi ambayo tumewahi kuyaona,” alisema, akiongeza kuwa tukio hilo liliwafanya wote kusimama kwa mshangao.
Misheni ya Artemis II ni ya kwanza ya binadamu kusafiri nje ya mzunguko wa chini wa Dunia tangu misheni ya Apollo 17 mwaka 1972.
Wanaanga hao wanasafiri umbali wa takribani maili 685,000 katika safari ya kuruka karibu na mwezi (lunar fly-by).
Mwanaanga Jeremy Hansen, ambaye ni kutoka Shirika la Anga la Canada, alisema kuwa licha ya kutarajia uzinduzi huo, alishikwa na mshangao mkubwa pale roketi ilipoanza kuruka.
Alisema kuna wakati wa sekunde chache wa kutokuamini kabla ya kutabasamu kutokana na tukio hilo kubwa.
Wanaanga wengine kwenye safari hiyo ni pamoja na Victor Glover na Christina Koch, ambao pia wanashiriki katika kazi za kisayansi na uendeshaji wa chombo hicho cha Orion.
Misheni inaendelea kwa siku kadhaa zijazo, ambapo wanaanga wataendelea kufanya majaribio, kuchunguza mazingira ya angani, na kujiandaa kwa hatua muhimu ya kuzunguka mwezi kabla ya kurejea duniani.
Artemis II ni hatua kubwa katika safari ya kurudi kwa binadamu mwezini, ikiwa ni ishara ya maendeleo ya teknolojia ya anga na ushirikiano wa kimataifa katika uchunguzi wa ulimwengu.
Umbali kutoka Dunia hadi Mwezi unabadilika kidogo kutokana na mzunguko wa Mwezi, lakini kwa wastani ni:
Takribani km 384,400
- Umbali wa karibu kabisa (perigee): ~ 356,500 km
- Umbali wa mbali kabisa (apogee): ~ 406,700 km
