Wataalamu wa afya duniani wamesema hakuna sababu kubwa ya tahadhari kupita kiasi kuhusu mlipuko wa Hantavirus ulioripotiwa kuhusishwa na meli ya utalii ya MV Hondius, wakieleza kuwa virusi hivyo haviambukizi kwa urahisi kama magonjwa mengine ya mlipuko.
Kwa mujibu wa World Health Organization (WHO), hantavirus huenea zaidi kupitia panya, ambapo binadamu huambukizwa kwa kuvuta hewa yenye chembechembe za virusi kutoka kwenye mkojo, mate au kinyesi cha panya walioambukizwa.
Ingawa aina ya Andes ya hantavirus inaweza kusambaa kutoka mtu mmoja kwenda mwingine kupitia mawasiliano ya karibu sana, wataalamu wanasema kiwango cha maambukizi duniani bado ni cha chini.
Baadhi ya wataalamu wanaamini baadhi ya maambukizi yaliyoripotiwa ndani ya meli ya MV Hondius yanaweza kuwa yalitokana na mawasiliano ya karibu kati ya watu waliokuwa ndani ya chombo hicho.
Afisa Mkuu wa Sayansi wa UK Health Security Agency, Robin May, amesema hatari kwa watu ambao hawajahusiana moja kwa moja na safari hiyo ya meli ni “ndogo sana.”
Wataalamu wanaendelea kusisitiza umuhimu wa usafi wa mazingira na kudhibiti panya ili kupunguza hatari ya maambukizi ya hantavirus.
