Klabu ya Manchester United imetambulisha rasmi jezi zake mpya za nyumbani kwa ajili ya msimu ujao wa 2026/27, ambapo timu hiyo itashiriki Ligi Kuu ya England pamoja na Ligi ya Mabingwa Ulaya na mashindano mengine ya ndani.
Jezi hizo, zilizotengenezwa kwa ushirikiano na kampuni ya Adidas, zimebuniwa kwa mtindo wa kisasa huku zikichochewa na muonekano wa jezi za klabu hiyo za miaka ya 1970. Lengo kuu ni kuunganisha historia na taswira ya sasa ya klabu, jambo linalotoa heshima kwa urithi wa “Mashetani Wekundu”.
Kwa mujibu wa mpango wa klabu, jezi hizo mpya zinatarajiwa kuanza kutumika rasmi katika mechi za mwisho za Ligi Kuu ya England msimu huu, hususan mechi za nyumbani zijazo, kama sehemu ya utangulizi kabla ya kuanza kwa msimu mpya.
Hatua hii inaendelea kuonyesha ushirikiano thabiti kati ya Manchester United na Adidas katika kuboresha muonekano wa klabu na kuwapa mashabiki bidhaa zenye mvuto na historia kwa pamoja.
