Rais wa Jamhuri ya Muungano wa Tanzania, Samia Suluhu Hassan, amemteua aliyekuwa Waziri wa Afya, Ummy Mwalimu, kuwa Mshauri wa Rais anayeshughulikia masuala ya afya, ustawi wa jamii, wanawake na watoto.
Kwa mujibu wa taarifa iliyotolewa leo Jumanne Juni 2, 2026 na Katibu Mkuu Kiongozi, Balozi Moses Kusiluka, kupitia Kurugenzi ya Mawasiliano ya Rais, Ikulu, uteuzi huo umeanza rasmi mara moja.
Taarifa hiyo imeeleza kuwa uteuzi wa Ummy Mwalimu unalenga kuimarisha ushauri wa kimkakati kwa Rais katika sekta muhimu zinazogusa maisha ya wananchi, hususan afya ya jamii pamoja na ustawi wa makundi maalumu yakiwemo wanawake na watoto.
Ummy Mwalimu ni mwanasiasa na mwanasheria mwenye uzoefu mkubwa katika utumishi wa umma na uongozi wa Serikali.
Katika safari yake ya kisiasa, Ummy alianza kuwa Mbunge wa Viti Maalum mwaka 2010 kabla ya kushika nyadhifa mbalimbali serikalini, ikiwemo nafasi ya Waziri wa Afya ambapo aliwahi kusimamia masuala mbalimbali ya sekta ya afya nchini.
Uteuzi huo unaonekana kuwa sehemu ya jitihada za Rais Samia kuendelea kuimarisha mifumo ya ushauri na utendaji katika sekta zinazohusu maendeleo ya jamii na huduma za kijamii nchini.
